Израелскиот премиер Бенјамин Нетанјаху ја напушти средбата во Белата куќа со американскиот претседател Доналд Трамп без конкретни резултати, иако ја очекуваше поддршката што ја имаше за време на првиот мандат на Трамп. Две работи му беа важни. Не ги доби. На крајот, според Си-Ен-Ен, тој останал шокиран и во неверување.
Состанокот требаше да се фокусира на новата царина од 17 отсто, наметната од САД за извозот на Израел. Иако Израел ги укина царините за американските производи еден ден претходно во обид да ја избегне мерката, Трамп не покажа подготвеност да направи отстапки.
Нетанјаху, со вообичаените пофалби за Трамп, најави брзо отстранување на трговските бариери, но Трамп само потсети дека Израел добива четири милијарди долари годишно од САД и одби да вети промени во царинската политика.
Најголем шок дојде околу темата за Иран, пишува Си-Ен-Ен. Иако израелските медиуми шпекулираа за можен воен напад, Трамп неочекувано најави почеток на преговори со Иран за нов нуклеарен договор, веќе овој викенд. Нетанјаху бил видно изненаден, а израелски извори тврдат дека тој не бил однапред информиран.
Според два извори за Си-Ен-Ен, објавата „сигурно не и се допаднала“ на израелската страна. Не е јасно дали Нетанјаху бил однапред информиран за американско-иранските разговори или дали воопшто бил консултиран.
Шок поради Ердоган
Нетанјаху рече дека се согласува со целта да се спречи Иран да развие нуклеарно оружје, но само доколку преговорите се водат според „либискиот модел“, односно со Иран целосно да се откаже од нуклеарна програма. Ако тоа не се случи, тој рече дека со Трамп детално разговарал за воената опција.
Ситуацијата дополнително ја искомплицираа ненадејните пофалби на Трамп кон турскиот претседател Ердоган, познат по острата антиизраелска реторика, особено кон Нетанјаху. Трамп рече дека има добри односи со него и верува дека може да ги реши разликите меѓу Турција и Израел, што во Израел предизвика дополнителна нелагодност.
Делумна утеха за Нетанјаху беше најавата на Трамп дека работи на договор за враќање на израелските заложници од Газа. Но, дури и изјавата на Трамп дека сака крај на војната беше политички чувствителна бидејќи Нетанјаху зависи од екстремно десничарските партии кои се противат на крај на конфликтот.
Како што заклучи израелскиот аналитичар Рони Шакед, „Биби се враќа дома со празни раце. Нема Иран, нема Газа, нема заложници – ништо“.
