Шумски пожари во Калифорнија принудија 20.000 луѓе на евакуација

Пожарникарите сѐ уште се борат со големите шумски пожари во Јужна Калифорнија, кои принудија повеќе од 20.000 луѓе да ги напуштат своите домови.

Пожарот што избувна во понеделникот набрзо до денеска се прошири на 15 квадратни километри поради силниот ветер. Повеќе од 1.500 пожарникари се борат да го локализираат, според Калифорниското одделение за шумарство и противпожарна заштита.

Иако се очекуваше подобрување на времето и стивнување на ветровите, синоптичарите соопштија дека силните ветрови ќе продолжат и денеска, особено на планините, а и понатаму има критични услови за пожари.

Голем дел од уништувањето се случи во Малибу, заедница од околу 10.000 луѓе на западниот раб на Лос Анџелес. Пламените јазици гореле во близина на куќите на познатите личности и Универзитетот Пепердајн, каде што биле евакуирани околу 3.000 студенти.