Што ѝ донесе на Европа „Денот на ослободувањето“ – ЕУ ќе одговори со „силен план“

Историската одлука на американскиот претседател Доналд Трамп за воведување царини за европските производи во САД, беше најавена за објава за синоќа во Вашингтон, во 4 часот по локално време, или 21 часот по средноевропско време.

Белата куќа го нарече 2 април „Ден на ослободувањето“, а што тој носи повеќе  детали за обемот и силата на мерките ќе се знаат денеска, но компаниите, потрошувачите и инвеститорите низ светот, вчера нестрпливо ги очекуваа кои, како што велат, ќе го преобликуваат светскиот трговски систем.

Портпаролката на Белата куќа, Каролин Левит, вчера изјави дека реципрочните царини против земјите што имаат мерки против американските производи, ќе стапат во сила веднаш откако Трамп ќе ги објави, а царината од 25 отсто за увоз на автомобили еден ден подоцна, на 3 април.

Во очекување на одлуката на Трамп, европските берзи вчераутро беа во минус. Цените на акциите паднаа поради внимателноста на инвеститорите пред објавувањето на одлуката.

Аналитичарите на Дојче банк предупредија на можни сериозни последици за американската и глобалната економија.

– Изгледите за широко применети тарифи јасно би претставувале огромен шок за глобалниот трговски систем и ќе има прилично сеизмички последици за светската економија – се вели во анализата на Дојче банк, пренесе Индекс.хр.

Европските претставници се подготвуваат за двоцифрени царини за нивниот извоз. Трамп претходно оваа година изјави дека планира да воведе царина од 25 отсто за стоки од Европската Унија. Политичките лидери во Европа и другите делови на светот сè уште дебатираат како да одговорат на очекуваните мерки од Доналд Трамп – дали да возвратат со сопствени царини или да се обидат да постигнат некаков договор.

Претседателката на Европската комисија, Урсула фон дер Лајен, рече дека ЕУ има „силен план“ да одговори на царините на Трамп. Лидерот на италијанската индустрија Емануеле Орсини, истакна дека тарифните штрајкови на Трамп ќе ги погодат медицината, храната и модата во Италија. Германските производители на автомобили и француската индустрија за вино и шампањ ќе бидат погодени затоа што се потпираат на американскиот пазар за дури 20 отсто од своите приходи, а влијанието може да го почувствуваат и британските инвеститори во европските компании.

Трамп веќе ги зголеми царините за увоз од Кина, челик, алуминиум и одредени производи од Канада и Мексико. Оваа недела треба да стапат на сила повисоките царини за автомобили. Сега се чека Трамп да ги открие деталите за неговиот план за поширок сет на царини, на кои неговиот тим работеше во последните неколку недели.