Што значат резултатите од германските избори за Украина и Русија?

Фридрих Мерц, претседател на Христијанско-демократската унија (ЦДУ) и веројатно иден германски канцелар по изборната победа на неговата партија, зазема цврст став за војната во Украина.

Мерц и ЦДУ постојано ја поддржуваат Украина, залагајќи се за зголемена воена помош и порешителни мерки против Русија.

За време на посетата на Киев во декември 2024 година, Мерц го критикуваше тогашниот канцелар Олаф Шолц дека одбил да испорача ракети со долг дострел Таурус на Украина, наведувајќи дека таквата политика „ја принудува Украина да се бори со едната рака врзана зад грб“. Мерц ја нагласи потребата Украина да добие способност за напад на воени бази во Русија за ефикасно да се одбрани, пишува Index.hr.

Во јануари оваа година, Мерц вети континуирана поддршка за Украина, нагласувајќи дека ставањето крај на руската агресија ќе биде приоритет на неговата влада. Тој нагласи дека Украина мора да ја добие војната.

„Победата значи враќање на територијалниот интегритет со демократски легитимна влада која има целосен суверенитет“, рече тој.

Во својата изборна платформа, ЦДУ вети дека ќе ги зголеми трошоците за одбрана, ќе ја врати задолжителната воена служба и ќе обезбеди дополнителна воена помош за Украина, вклучително и напредни системи за оружје. Мерц, исто така, предложи построги санкции против Русија и намалување на енергетската зависност од руските извори.

И покрај критиките за евентуално потпирање на поддршката на екстремно десничарската партија Алтернатива за Германија (АфД) во парламентот, Мерц ја отфрли можноста за коалиција со АфД. Неговиот цврст став кон Русија и поддршката за Украина остануваат клучни елементи на неговата надворешна политика.

Политиката на Мерк кон Украина ја одразува решеноста на ЦДУ да го поддржи суверенитетот на Украина и да ја обезбеди безбедноста на Европа преку силен одговор на руската агресија.