Шокантен потег на Будимпешта: Унгарија се повлекува од Меѓународниот кривичен суд

Унгарската влада објави дека се повлекува од Меѓународниот кривичен суд (МКС). Висок функционер во владата на премиерот Виктор Орбан, Гергели Гуљас, го објави потегот само неколку часа откако израелскиот премиер Бенјамин Нетанјаху, по кого МКС издаде налог за апсење, пристигна во земјата во државна посета, јавува Би-Би-Си.

Орбан му се јави на израелскиот лидер штом беше издаден налогот за апсење минатиот ноември, изјавувајќи дека решението „нема да има ефект“ во неговата земја.

Во ноември, судиите на МКС заклучија дека има „разумна основа“ Нетанјаху да сноси „кривична одговорност“ за наводните воени злосторства и злосторства против човештвото за време на војната меѓу Израел и Хамас.

Нетанјаху ја осуди одлуката на МКС, нарекувајќи ја „антисемитска“.

Унгарија е една од основачките членки на МКС, кој има 125 земји-членки. САД, Русија, Кина и Израел, меѓу другите земји, не ја признаваат нејзината јурисдикција. МКС има овластување да ги гони обвинетите за геноцид, злосторства против човештвото и воени злосторства на територијата на државите потписнички на Римскиот статут, неговиот основачки договор.