Грчките власти ги советуваа жителите на егејскиот остров Санторини утре да ги затворат училиштата, да избегнуваат две мали пристаништа и да се воздржат од собирање во затворени простории по зголемената сеизмичка активност во областа во последните денови.
Серија земјотреси со јачина до 4,3 степени според Рихтеровата скала се регистрирани во петокот и саботата на подрачјето меѓу вулканските острови Санторини и Аморгос, соопшти вчера попладне Министерството за цивилна заштита.
Министерството соопшти дека активноста не е поврзана со вулканска активност, но експертите предложија мерки на претпазливост, вклучително и затворање на училиштата. Тие, исто така, ги повикаа луѓето да не се приближуваат или да се задржуваат во малото пристаниште Амуди и пристаништето Фира, кои главно опслужуваат бродови за крстарење.
Според Геодинамичкиот институт во Атина, земјотреси со јачина од 2,8 до 4,5 степени утрово ја погодија областа, но не предизвикаа штети. Грција се наоѓа на неколку раседи и има чести земјотреси. Санторини е една од најпосетуваните грчки туристички дестинации.
Една од најголемите ерупции во историјата, околу 1600 п.н.е., го формирала островот во неговата сегашна форма. Последната ерупција во областа се случила во 1950 година.
ИЗДВОЕНИ
Семејството на Фросина бара разрешување на судијката која го пуштила возачот од притвор за дрога
МЕЃУНАРОДНА ПОЛИЦИСКА АКЦИЈА: Во Македонија се принтале пари во домашни печатници
Зошто младите Европејци ги напуштаат своите земји? Македонија има едно од највисоките нивоа на одлив на мозоци во светот!
Спектакуларни снимки од Нови Сад под блокада: Море од луѓе во борбата за правда/ФОТО
