Седумдневна жалост за повеќе од 2.700 жртви во разорниот земјотрес во Мјaнмар

Бројот на загинати во разорниот земјотрес што го погоди Мјанмар се искачи на 2719, додека 4521 лице се повредени, а 441 се водат како исчезнати, се наведува во изјавата на генерал Мин Аун Хлајн, лидерот на воената хунта во земјата.

Воената влада на Мјанмар, прогласи седумдневна национална жалост, а едноминутно молчење ќе биде одржано во 12:51 часот по локално време, точно кога е почувствуван земјотресот, јавува Би-Би-Си.

Повеќе од 2.700 луѓе во Мјанмар загинаа во земјотресот со јачина од 7,7 степени според Рихтеровата скала што минатиот петок ги погоди областите подалеку како Тајланд и Кина.

Во соседен Тајланд, според официјалните податоци, загинаа 20 луѓе, додека 78 се водат како исчезнати, главно градежни работници, а илјадници се евакуирани од испуканите згради во Бангкок. Десет од жртвите загинале на градилиште на новата зграда на Државната ревизорска служба на Тајланд, додека останатите загинале во други делови од градот, пренесе „Бангкок пост“.

Спасувачите во двете земји се уште трагаат по преживеани, иако има се помалку надеж дека ќе има преживеани под урнатините откако ќе помине критичниот период – првите 72 часа по земјотресот.

Неколку земји испратија хуманитарна помош за Мјанмар и соседен Тајланд по силниот земјотрес што во петокот ги погоди двете југоисточни азиски држави. Напорите за помош се фокусирани на најпогодените подрачја во Мјанмар, каде што бројот на жртви постојано расте.

Епицентарот на земјотресот со јачина од 7,7 степени бил во близина на Мандалеј – вториот најголем град во Мјанмар, со население од околу 1,5 милиони жители.