Се садат чинари во училиштата и градинките во Кисела Вода

Во дворот на ООУ „Кузман Шапкарев“, денеска се спроведуваше акција за садење на дрвја-чинари, како дел од големата еколошка иницијатива што ја спроведува Општина Кисела Вода во сите училишта и градинки.

Оваа акција се реализира со поддршка од Канцеларијата за проектни услуги во рамките на проектот „ЕУ за чист воздух“, финансиран од Европската Унија, која ги донираше садниците.

На акцијата присуствуваше и градоначалникот на Општина Кисела Вода, Орце Ѓорѓиевски, кој нагласи дека оваа донација е особено значајна, бидејќи се насочува токму кон училиштата и градинките, местата каде што растат и се образоваат децата.

– Покрај бројните акции за пошумување, во сите училишта поставивме прочистувачи на воздух, а во поголемите паркови на отворено – надворешни пречистувачи, достапни за сите граѓани. Нашата заложба за чиста и здрава животна средина нема да запре овде. Продолжуваме со реализацијата на еколошките проекти, кои ќе донесат подобри услови за сите жители на Кисела Вода – изјави Ѓорѓиевски.