Се паркирал пред кафеана на велосипедска патека, па отишол да руча – пајакот пак кабает!

Санкциониран возачот кој непрописно го паркирал возилото во скопско Дебар Маало, а внатрешната контрола при МВР го испитува случајот со видеото кое денеска молскавично се споделува на социјалните мрежи. Се работи за џип “порше“ кое неколку часа било паркирано на недозволено место, пред кафеана на велосипедска патека. На видеото се гледа како екипи на ПОЦ дојдоа да го дигнат, но се премислуваат, веројатно откако констатирале дека е на некој “познат“ сопственик. Токму во моментот кога вработените во пајак служба сакаат да си заминат, група граѓани ги снимаат и буквално ги изнудија возилото да го остранат и да го однесат во депо. Иако, првично граѓаните се сомневаа дека се работи за полициски службеник, сепак од полицијата информираа дека? „ предметното возилото не е на полициски службеник“.

-Во врска со видеото на социјалните мрежи на кое се гледа непрописно паркирано возило со скопски регистарски ознаки на територија на Дебар Маало во Скопје, Министерството за внатрешни работи ја информира јавноста дека конкретниот настан се случил на 22.03.2025. Имено, возилото е подигнато од страна на ПОЦ, а од страна на СВР Скопје преземени се мерки по член 63 став 6 од Закон за безбедност на сообраќајот на патиштата и на возачот на возилото С.К. издаден му е платен налог. Во врска со постапувањето пак на полициските службеници при подигнувањето на возилото, веќе постапува Одделот за внатрешната контрола, криминалистички истраги и професионални стандарди при МВР и по завршување на целокупната постапка соодветно ќе ја известиме јавноста, информираат од МВР.

Видеото предизвика силни реакции во јавноста, граѓаните велат дека ова не е изолиран случај, туку дека непрописно паркирани возила на локални “моќници“ има во секој град, наслеба, кафуле.

Градоначалникот на Општина Центар Горан Герасимовски под чија ингеренција е ПОЦ истакнува дека се крајно некоректни и манипулативни обидите од некои медиуми да се префрли одговорноста на Пајак службата која, според него, професионално си ја врши работата.

„Отстранувањето на непрописно паркираните возила е по налог на службено овластено лице. Во случајов нашите вработени воопшто не го стопираат кревањето, туку едноставно чекаат налог од страна на службеното лице, полицаец. По добивање на истиот веднаш постапуваат и го креваат возилото. Тоа впрочем и го објаснува службеникот од ПОЦ во самото видео. Благодарност до екипите на ПОЦ кои неуморно работат на санкционирање на несовесни возачи. Ја поздравувам и активноста на граѓаните кои бараат санкционирање на сите оние коишто со своите возила ги блокираат улиците и велосипедските патеки во Центар. Истовремено, недозволиво е полициски службеник да не сака да си ја врши својата работа. Барам од МВР да ги санкционира полициските службеници кои не постапуваат при очигледни прекршоци. Недозволива е селективноста при казнување на граѓаните“, потенцира Герасимовски.