Службите на Општина Центар започнаа акција за чистење на голема дива депонија во Буњаковец, на локацијата позади катната гаража. Станува збор за јавен простор, нелегално заграден и узурпиран, кој од несовесни лица бил користен за одложување смет и мешан комунален отпад.
Од Општина Центар информираат дека инспекциските служби на самото место затекнале огромна количина отпад кој бил собиран, претставувајќи потенцијално жариште на зарази и закана за здравјето на жителите, особено поради тоа што се работи за локација во близина на трговскиот центар, станбени згради и ООУ „Јохан Хајнрих Песталоци”.
Градоначалникот на Општина Центар, Горан Герасимовски потенцира дека изминатиов период се расчистени повеќе депонии, како онаа кај трговскиот центар „Ист Гејт“, а Општината како што истакна поттикната од непостапувањето на Град Скопје, започнала и голема акција во соработка со граѓаните, под мотото „Центар не чека, Центар чисти.“
-Во рамки на оваа акција, исчистивме повеќе населби, особено просторот околу контејнерите и кантите кои се под надлежност на Град Скопје, но не се одржуваат редовно и претставуваат жаришта на зарази. Граѓаните на Центар заслужуваат чисти улици и места каде што ќе можат безбедно да го поминуваат своето слободно време во здрава животна средина – наведе Герасимовски.
Тој ги повикува сите жители да се приклучат кон акцијата и да пријавуваат диви депонии, но пред сè, да покажат еколошка одговорност и грижа за својата населба и околина.
