Дијаманти, даночни затајувања, пари во кеш, двојни уплати…Сето ова ги затекна државните институции по извршениот претрес во повеќе фирми и живеалишта на бизнисмени во Струмица Скопје и Гостивар. По претресот, на разговор во полиција се повикани управители, адвокати и нотари. Од тоа што во моментов е познато е дека е одземена огромна документација, но и други предмети кои се наоѓаат при самите претреси.
Сознанијата се дека акцијата се одвивала главно на територијата на Струмица, а детали нема, бидејќи станува збор за предистражна постапка која според закон е тајна.
Некои медиуми објавија непотврдени информации дека се работи за афера тешка десетици милиони евра, дека акцијата наводно е насочена кон струмички бизнисмен и дека при претресите биле пронајдени дијаманти и поголеми суми пари во кеш. При претресот кој се одвивал на повеќе локации низ државата, повеќе лица се во бегство, а бизнисменот е обезбеден на органите кои ја водат акцијата.
Како што информираше МВР, откриени биле и косовски државјани кои формирале фирми кои имале деловна активност со струмичкиот бизнисмен кој важи близок до струмичкото семејство на поранешниот премиер Зоран Заев. Покрај дијамантите, пронајдена била и поголема сума на пари во кеш која наводно ја чувал неговиот магационер во Скопје.
Министерката за финансии, Гордана Димитриеска-Кочоска, преку објава на својот фејсбук-профил, им се заблагодарува на сите што учествуваа во акцијата во четвртокот, во Струмица и во други градови во земјава, за откривање финансиски криминал. Таа вели дека лично учествувала во претресите во Струмица, нешто невидено досега од министер за финансии и надвор од описот на нејзината работа.
– Сакам да искажам огромна благодарност до Управата за јавни приходи и директорката Елена Петрова, а особено до колегите од Струмица и од другите градови, кои денес, заедно со мене, цел ден неуморно работеа во спроведувањето на акцијата во Струмица. Дел од нив директно со мене во Струмица, а дел и низ други градови на Македонија. Исто така, огромна благодарност до Министерството за внатрешни работи, Бирото за јавна безбедност и до Царинската управа, кои им беа огромна поддршка на колегите од УЈП. Покажавме дека сплотениот тим е посилен од сѐ – порача Димитриеска-Кочоска на својот фејсбук- профил.
По доставено известување од страна на МВР за сознанија до кои дошла УЈП, Основното јавно обвинителство за гонење на организиран криминал и корупција оформи предмет поради основи на сомневања за сторени кривични дела од областа на финансискиот криминал, односно „даночно затајување“ по член 279 „даночна измама“ по член 279-а и „перење пари и други приноси од казниво дело по член 273 од Кривичниот законик на група субјекти, соопшти Обвинителство.
Основното јавно обвинителство за гонење организиран криминал и корупција оформи предмет по доставено известување од Министерството за внатрешни работи за сознанија до кои дошла Управата за јавни приходи. Предметот е оформен поради основи на сомневања за сторени кривични дела од областа на финансискиот криминал, односно даночно затајување, даночна измама и перење пари и други приноси од казниво дело на група субјекти.
– За докажување на основите на сомневање за сторување на наведените кривични дела, на барање од предметниот јавен обвинител, судија на претходна постапка при Основниот кривичен суд – Скопје издаде наредби за претрес на дом и на други простории на повеќе локации во повеќе градови – посочија од Обвинителството. Предмет на истрагата е колапсот на Еуростандард банка и на фирмите, пред сѐ од Струмица, кои придонеле за него.