Стручњаците од Градежниот факултет при УКИМ од Скопје го изработија техничкото решение за санација на мостот на реката Вардар кај Башино Село, на влезот во Велес и го доставија до Јавното претпријатие за државни патишта, информира деканот на Градежниот факултет во Скопје, проф. д-р Горан Марковски.
Сега останува ЈПДП да распише тендер и да избере изведувач за да започне санацијата на мостот на кој од 4 јануари годинава е запрен секаков вид сообраќај, поради влошената состојба на носечките столбови, а со цел да се спречи трагедија при негово уривање.
Професорот Марковски првично оцени дека треба да се санира мостот за месец до месец и пол. Тој и неговите колеги во саботата направија дополнителни испитувања на мостот, односно пробно товарење со камиони од 40 тони, статичко и динамичко на горниот строј на мостот на носачите за да видат во каква состојба се и од тој аспект да може да донесат техничко решение што понатаму со него.
Како трајно решение на проблемот на велешани, премиерот Христијан Мицкоски, при посетата на мостот во Велес, на 4 јануари годинава, најави дека по завршувањето на сите административни процедури, ќе биде изграден нов мост на Вардар кај Велес, педесетина метри подолу од постојниот, а неговата изградба да почне кон средината од оваа година.
