Поради обилните врнежи од дожд во вчеравечер, Маркова Река се излеа од своето корито и поплави делови од Студеничани, Кисела Вода и Аеродром. Од Центарот за управување со кризи информираа дека реката била излеана преку мостот кај населеното место Љубош и низводно, при што биле поплавени неколку куќи, магацини и индустриски објекти во селата Студеничани, Батинци и делови кон Пинтија.
Првично беше кажано дека мостот кај местото викано Љубош, на влезот во селото Батинци поради безбедност е затворен за сообраќај, но по увидот на Институтот за сеизмички отпорни градби и климатски промени, тој е ставен во функција, но дека ќе бидат потребни интервенции за негово зацврстување.
Градоначалникот на Општина Студеничани, Азем Садики рече дека поплавени биле 10 куќи покрај реката, но за среќа нема жртви и има само материјална штета. Денеска водата се повлече, но Садики истакна дека на вонредна седница ќе се дискутира за проценката на материјалната штета од поплавите, но и како што рече ќе се однесе одлука да се реализира акција за расчистување на наносите направени од излевањето на Маркова Река. Садики додаде дека ќе разгледа и можноста да се најде трајно решение, бидејќи како што кажа, оваа река одвреме-навреме се излева и им предизвикува проблеми на жителите.
На припомош на жителите на овие места кои беа загрозени од излевањето на реката веднаш им пристигна екипа од Дирекцијата за заштита и спасување која со со пумпи ја извлекуваше водата од поплавените објекти.
Градоначалникот на Општина Кисела Вода, Орце Ѓорѓиевски, во изјава за весникот ВЕЧЕР истакна дека веднаш презеле активности.
– Во текот на ноќта, со лична ангажираност, учествувавме во евакуацијата на нашите сограѓани: Енис, Фуркан, Хамза и Али, кои беа заглавени во надојдените води – сега се безбедни. Мустафовски, кој беспомошно се бореше да не стане жртва на разбеснетата река – денес е дома. И уште многу други – денес се живи и со своите семејства благодарение на брзата реакција – наведе Ѓорѓиевски.
Покрај булеварот „Борис Трајковски“ биле поплавени три магацини поради неисчистените шахти на сообраќајницата. Ѓорѓиевски изрази револт бидејќи, како што потенцираше, скопската градоначалничка Данела Арсовска не мрднала со прст, иако булеварот е во надлежност на Град Скопје.
– Од Град Скопје побаравме во неколку наврати да се среди речното корито, но, од градоначалничката во заминување ни беше одговорено дека немаат предвидено средства за тоа. Замислете…- реагираше Ѓорѓиевски.
Од Град Скопје пак, истакнаа дека надлежноста за одржување на одводните канали и коритото на реката Маркова Река е на општина Студеничани и Министерството за животна средина и просторно планирање.
– Градот Скопје во неколку наврати досега апелираше до надлежните во општината за потребата од чистење на каналите и коритото, но апелите за жал не наидоа на резултат од страна на одговорните – соопштија градските власти, додавајќи дека за дезинформациите ќе бараат и правна одговорност.
Екипи од Противпожарната бригада на Град Скопје, ЈП „Водовод и канализација“ и останатите претпријатија на градот Скопје се на терен и активно помагаат во спречување на дополнителни штети и санирање на веќе настанатите.
Ѓорѓиевски на тоа возврати дека иако надлежноста е на Градот Скопје, од кој како што истакна тие веќе подолго време бараат санација на коритото на Маркова Река, (за што уредно имале доставено документација, но добиле и известување дека „нема предвидени средства“), се решиле да не чекаат да дојде до уште една трагедија.
Од Општина Аеродром информираа дека од излевањето на Маркова Река на нивната територија нема поплавени куќи.
– Поплавени се неколку магацини и земјоделски објекти, како и дел од полето во Горно Лисиче. Уште во текот на ноќта беше ангажирана механизација што работеше на одводнување на коритото на Маркова Река и на заштита на објектите за домување. Исто така, подрачното основно училиште „Гоце Делчев“ во Долно Лисиче беше веднаш отворено за евентуална евакуација на нашите сограѓани – соопштија од Општина Аеродром и додадоа дека екипи на Општина Аеродром, ДЗС и МВР се повторно на терен и оти се врши увид на состојбата, по што ќе се дејствува во согласност со можностите на самиот терен – заклучија од локалната самоуправа. Оттаму додадоа дека поплавата предизвикала оштетување на пругата меѓу Горно Лисиче и Драчево.
Од МВР известија дека поради обилните врнежи од дожд на територија на град Скопје и излевањето на Маркова река, сè уште е затворен за сообраќај во двете насоки локалниот пат село Горно Лисиче – село Долно Лисиче, како и влезот за село Батинци во двете насоки и дека се преземаат мерки за посебен режим на сообраќај. При тоа, апелираат до сите учесници во сообраќајот да се почитуваат наредбите на полициските службеници.
Од „Македонија пат“ известуваат дека сообраќајот на регионалниот патен правец Р1312 на мостот на реката Вардар кај Башино Село ќе биде привремено затворен за сообраќај за сите видови на возила поради висок водостој на реката Вардар.
Поради обилните врнежи од дожд зголемен е водостојот на поголемиот дел од реките споредено со априлскиот просек. Мерењата на УХМР вчераутро во 07:30 часот покажале дека е зголемено нивото на Вардар кај Јегуновце, Скопје Железнички мост, Лепенец, Велес и Демир Капија.
УХМР регистрира зголемен водостој и на Треска кај Македонски Брод, Пчиња кај Пелинце и Катлановска Бања, Бабуна кај Богомила, Брегалница кај Берово и Штип, Црна Река кај Новаци…
СДСМ: Директно одговорни за последиците од излевањето на Маркова Река се Митески и Муцунски
По случувањата со излевањето на Маркова Река, опозициската партија СДСМ повика ВМРО-ДПМНЕ да понесе одговорност за неодговорното и недомаќинско управување со општина Аеродром, а како директно одговорни за последиците од излевањето на Маркова Река ги посочи Дејан Митески и Тимчо Муцунски
-Наместо проширување на мостот и уредување на коритото на Маркова Река, меѓу Горно и Долно Лисиче, како што ветуваа Дејан Митески и Тимчо Муцунски пред четири години, добивме поплавени имоти на жителите, целосен прекин на сообраќајот и страв и несигурност од поголеми штети – реагираа од СДСМ.
Тие јавно го прашаа в.д. градоначалникот Дејан Митески: Зошто четири години нема ни „п“ од проширување на мостот и ни „к“ од кеј на Маркова Река? Кога последен пат е исчистено коритото на Маркова Река? Колку казни се изречени во последните четири години за фрлање ѓубре и отпад во коритото на Маркова Река? До кога планирате да ги манипулирате жителите на Горно и Долно Лисиче со разни нереални ветувања како кеј со трим патека, велосипедска патека и урбана
(А.П.)
