Санторини го погоди најсилниот земјотрес досега: За две недели регистрирани речиси 13.000 потреси

Грчкиот остров Санторини е погоден од нов силен земјотрес со јачина од 5,3 степени според Рихтеровата скала, најсилниот регистриран од почетокот на сеизмичката активност во областа во јануари.

Земјотресот е почувствуван и во Атина, на 240 километри, во понеделникот вечерта, а длабочината на епицентарот е измерена на 17 километри.

Во областа Санторини, популарна туристичка дестинација, од 26 јануари до 9 февруари се регистрирани 12.800 земјотреси, според Сеизмолошката лабораторија на Универзитетот во Атина. Вонредната состојба на Санторини е на сила до 3 март, а досега се евакуирани повеќе од 11.000 луѓе, главно локални жители.

На овој грчки остров живеат околу 15.000 луѓе.

Жителите на соседниот остров Аморгос и понатаму се во состојба на готовност по најновиот потрес, кој уследи по умерен земјотрес со јачина од пет степени според Рихтеровата скала меѓу островите во неделата вечерта.

Експертите велат дека сеизмичката активност е зголемена во последните денови и дека земјотресите се над четири степени според Рихтеровата скала и дека нема знаци дека наскоро ќе се смират.

Училиштата на Санторини и другите соседни острови, вклучувајќи ги Анафи, Парос, Наксос и Миконос, остануваат затворени.

Грција е една од европските земји најподложни на земјотреси, иако научниците се збунети од оваа сеизмичка активност.

Грчките власти претходно соопштија дека земјотресите се поврзани со движењето на тектонските плочи, а не со вулканската активност. Властите исто така предупредија да се избегнуваат одредени делови на островот и да се испразнат базените.