Министерот за локална самоуправа, Златко Перински, заедно со заменик министерот Ерџан Селими, денеска во рамки на „Каде што срцето е дома“, ја посети Општина Бутел и одржа работна средба со градоначалникот Дарко Костовски и членовите на општинскиот Совет.
На средбата од каде била упатена пораката: „Само преку отворен дијалог и функционална самоуправа, можеме да изградиме општини што навистина работат во интерес на своите жители“, било дискутирано за најважните локални прашања, но и за поширокиот контекст на унапредување на локалната самоуправа.
Од Министерството за локална самоуправа информираат дека покрај разговорите за тековните предизвици и приоритети во општината, особено внимание било посветено на размената на мислења во врска со измените на Законот за локална самоуправа, неговата примена и можностите за негово унапредување.
„Граѓаните мора да бидат во центарот на секоја политика. Законот за локална самоуправа е алатка, но неговата сила зависи од тоа колку сме подготвени да го користиме во полза на сите жители во општините – отчетно, транспарентно и со реално учество на граѓаните“ – било истакнато на средбата на која се разговарало и за реализацијата на дванаесетте проекти кои во општина Бутел се изведуваат со средства од првиот владин повик за поддршка на инфраструктурни капитални проекти.
