Појадокот е клучен оброк, особено ако целта ни е да имаме доволно енергија за напорен ден и да го доведеме телото во форма пред летото. Според експертите, утринскиот оброк богат со протеини може да ни помогне подолго да останеме сити, да ја намалиме потребата од грицки и да ја зачуваме мускулната маса.
Подолу се три вкусни и едноставни рецепти препорачани од лекарите и нутриционистите:
1. Протеински шејк за енергичен почеток на денот
Д-р Алекс Фоксман препорачува протеински шејк направен со три основни состојки: протеин од сурутка, спанаќ и бадемово млеко.
Оваа комбинација помага да се контролира апетитот и да се зачуваат мускулите, а исто така е нискокалорична. Протеинот од сурутка е целосен извор на протеини кој брзо дава чувство на ситост, додека спанаќот обезбедува влакна, витамини и минерали. Бадемовото млеко дава кремаста текстура, но со помалку калории од обичните млечни производи.
– Протеинот од сурутка е идеален за зајакнување и зачувување на мускулите – изјави д-р Фоксман за порталот SheFinds.
2. Овесна каша со грчки јогурт и бобинки
Овесната каша подготвена навечер е одлична опција за брз и здрав појадок наутро. Грчкиот јогурт е богат со протеини, овесната каша ги обезбедува потребните влакна, а бобинките се полни со антиоксиданси и витамини.
– Овој оброк содржи околу 20 грама протеини благодарение на јогуртот и чиа семето. Протеините го продолжуваат чувството на ситост, додека влакната го помагаат варењето. „Овошјето додава свежина и вкус, а има малку шеќер“, објаснува нутриционистот Крутика Нанавати.
Рецептот е едноставен – измешајте ги сите состојки во тегла или сад со капак, затворете го и оставете го во фрижидер преку ноќ. Наутро – појадокот е подготвен.
3. Изматени јајца со зеленчук и чаден лосос
Комбинацијата од јајца и лосос ја носи вистинската доза на протеини, а зеленчукот обезбедува дополнителни влакна и витамини. Вкусен и заситен оброк кој дава енергија за цел ден.
– Во ова изматено јајце има околу 25 грама протеини. Јајцата и лососот даваат и здрави масти, додека зеленчукот го освежува јадењето и додава хранлива вредност, вели Нанавати.
Совет: Зеленчукот можете да го исечете однапред и да го чувате во фрижидер. Наутро брзо испржете го, додадете јајца, лосос и малку сирење, зачинете по вкус – и оброкот е готов за неколку минути, пишува Index.hr.
