Руската елита е уморна од чекање да заврши војната

Елитата во Русија станува сè поизморена од чекањето да заврши војната во Украина и е загрижена за долгорочното влијание на западните санкции врз економијата, се вели во неодамнешниот извештај на веб-страницата Медуза.

Високи извори за овој независен руски портал изјавија дека руските елити се разочарани што војната против Украина не е завршена до крајот на 2024 година, објави Business Insider.

Изворите вклучуваат луѓе кои се блиски на руската претседателска администрација, двајца пратеници на Државната дума, еден сенатор и тројца високи функционери од регионалните влади во Русија. Еден владин извор рече дека општите чувства се „разочарување“ и „замор“.

„Чекавме војната да престане, борбите да завршат. Уморни сме дури и од самото чекање“, рече тој.

Два извори блиски до претседателската администрација рекоа дека владата нема јасна визија за повоениот период. Во меѓувреме, друг извор рече дека руската елита, првенствено високите безбедносни функционери, стануваат иритирани од недостатокот на работна сила и материјали за водење војна и веруваат дека претседателот Владимир Путин мора да иницира мобилизација за понатамошно прилагодување на руското општество и економија на воените услови.

Откако започна целосна инвазија на Украина во 2022 година, Русија значително ја зголеми својата воена економија. Меѓутоа, војната имаше огромна цена. Загубите на руските војници растат шест месеци по ред, соопшти Министерството за одбрана на Велика Британија оваа недела, цитирајќи податоци од Украина. Тие рекоа дека најскапиот ден за Русија бил 19 декември, кога биле убиени или ранети 2.200 војници. Руската економија е исто така под притисок поради постојаната висока инфлација, забавувањето на економскиот раст и западните санкции.

Сепак, Институтот за проучување на војната (ISW), тинк-тенк со седиште во Вашингтон, рече дека извештајот на Медуза сугерира дека високи руски воени и безбедносни претставници веруваат дека Путин треба да ја ескалира војната наместо да бара дипломатско решение.

Russia’s elites say they are tired of waiting for the war to end: report https://t.co/AkOFM4TcVX

— Business Insider (@BusinessInsider) January 10, 2025

Во својот извештај, ISW наведе дека руските безбедносни и воени претставници се чини дека не се подготвени да се откажат од војната, и покрај зголемените загуби на бојното поле.

Наместо тоа, вели ISW, тие се чини дека се залагаат Путин да ги интензивира воените напори со повикување дополнителни резервисти и формално префрлање на воена економија.

Сепак, според ISW, рускиот претседател се противи на понатамошна мобилизација на руската економија или делумно присилно регрутирање на резервисти, бидејќи таквите мерки би биле крајно непопуларни и дополнително ќе го влошат недостигот на работна сила во земјата.