Русите подготвени: Чекаме сигнал од Киев

Москва чека сигнал од Киев за продолжување на директните преговори, изјави портпаролот на Кремљ, Дмитриј Песков, објави „Киев пост“.

Сигналот за подготвеноста на Украина да ги продолжи директните преговори со Русија треба да дојде од Киев, изјави Песков пред новинарите, одговарајќи на прашање од новинската агенција ТАСС.

„Сигналот мора да дојде од Киев. Тие барем треба да преземат некаков чекор во таа насока. Сè уште постои законска забрана за тоа. Досега не видовме никакви конкретни дејствија“, рече Песков, одговарајќи на прашањето дали Русија очекува сигнал од Вашингтон или директно од Киев.

Русија и САД делат голем број допирни точки на контакт во своите позиции за Украина, но е прерано да се зборува за какви било конкретни услови на договор, изјави вчера портпаролот на Кремљ, Дмитриј Песков.

„Постојат многу позиции што навистина се совпаѓаат со нашите“, рече Песков, истакнувајќи дека иако напорите за решавање на украинскиот конфликт продолжуваат, засега не треба да се дискутира за специфични услови.

Тој додаде дека преговорите не можат да се одржат јавно, сигнализирајќи дека разговорите се водат зад затворени врати.

Песков, исто така, нагласи дека ставовите на американскиот претседател Доналд Трамп за Украина во голема мера се совпаѓаат со оние на Русија.