Рубио: Стејт департментот го извести Конгресот за намерата за реорганизација на УСАИД

Американскиот државен секретар Марко Рубио објави дека Стејт департментот го известил Конгресот на САД за својата намера да ја реорганизира УСАИД, велејќи дека агенцијата „одамна отстапила од својата првична мисија, пренесува Радио Слободна Европа.

Благодарение на претседателот Трамп, оваа погрешна и фискално неодговорна ера сега заврши. Ги преориентираме нашите програми за странска помош за да ги усогласиме директно со она што е најдобро за Соединетите Држави и нашите граѓани“, рече Рубио.

Во изјавата се вели дека Стејт департментот и УСАИД го известиле Конгресот за нивната намера да преземат реорганизација „што ќе вклучи преусогласување на одредени функции на УСАИД со Министерството до 1 јули и елиминирање на преостанатите функции на УСАИД кои не се усогласени со приоритетите на администрацијата“.

Откако Трамп го започна својот втор мандат на 20 јануари, Министерството за владина ефикасност (DOGE) предводено од милијардерот Илон Маск започна обид за намалување на УСАИД и спојување на неговите остатоци со Стејт департментот.

Оттогаш, администрацијата отпушти стотици вработени и изведувачи и ги намали услугите вредни милијарди долари од кои зависеа десетици милиони луѓе ширум светот.

Рубио претходно овој месец рече дека повеќе од 80 отсто од сите програми на УСАИД се откажани.

Како што јави Ројтерс, на персоналот на УСАИД им било кажано дека ќе бидат елиминирани сите позиции кои не се задолжени со закон, откако Стејт департментот го известил Конгресот дека ќе ги прекине функциите на УСАИД кои не се во согласност со приоритетите на администрацијата на Трамп.

Овој потег ќе значи дека речиси сите преостанати вработени во УСАИД ќе ги загубат своите работни места во јули и септември, датумите на разделување наведени во интерниот меморандум испратен до персоналот од Џереми Левин, член на ДОГЕ.