Соединетите Американски Држави и Украина планираат да го потпишат долго разгледуваниот договор за минерални суровини, по расправијата во Овалната соба минатиот петок, кога украинскиот претседател Володимир Зеленски беше исфрлен од Белата куќа, објави Ројтерс, цитирајќи четири извори запознаени со ситуацијата, пренесува хрватски Индекс.
Американскиот претседател Доналд Трамп им рекол на своите советници дека сака да го најави договорот во своето обраќање пред Конгресот вечерва, соопштија три извори, нагласувајќи дека договорот се уште не е потпишан и дека ситуацијата може да се промени.
Белата куќа не одговори веднаш на барањето за коментар. Ниту украинската претседателска администрација во Киев, ниту украинската амбасада во Вашингтон веднаш не одговорија на барањата за коментар.
Договорот беше одложен во петокот, по спорниот состанок на Овалната соба меѓу Трамп и украинскиот претседател Володимир Зеленски, што резултираше со брзо заминување на украинскиот лидер од Белата куќа. Зеленски отпатува во Вашингтон за да го потпише договорот.
За време на таа средба, Трамп и потпретседателот Џеј-Ди Венс го критикуваа Зеленски, велејќи му дека треба да им се заблагодари на САД за поддршката наместо да бара дополнителна помош пред американските медиуми.
„Се коцкаш со Трета светска војна“, му рекол Трамп.
Американските власти разговараа со претставници на Киев во последните денови за потпишување на договорот за минерали и покрај спорот и ги повикаа советниците на Зеленски да го убедат украинскиот претседател јавно да му се извини на Трамп, рече еден од изворите запознаени со ситуацијата.
Зеленски на платформата „X“ објави дека Украина е подготвена да го потпише договорот и рече дека му е жал за она што се случи во Белата куќа.
„Нашиот состанок во Вашингтон, во Белата куќа во петокот, не помина според планираното“, напиша тој во својата објава. „Украина е подготвена да дојде на преговарачка маса што е можно поскоро за да се доближи траен мир.
Договорот што требаше да биде потпишан минатата недела не вклучува експлицитни безбедносни гаранции за Украина, но на САД им овозможи пристап до приходите од природните ресурси на Украина. Таа, исто така, предвидуваше украинската влада да инвестира 50% од идната монетизација на сите природни ресурси во државна сопственост во фонд за реконструкција со кој управуваат САД и Украина.
Трамп вчера сигнализираше дека неговата администрација останува отворена за потпишување на договорот, велејќи им на новинарите дека Украина „треба да биде поблагодарна“.
„Оваа земја им застана низ сето тоа, добро и лошо“, рече Трамп. „Ние им дадовме многу повеќе од Европа, а Европа требаше да даде повеќе од нас.
