РК Вардар си го врати своето дете

Најтрофејниот македонски ракометен клуб  Вардар, во новата сезона ќе има нов играч кој што ќе настапува на позицијата кружен напаѓач. По пауза од неколку сезони „црвено-црниот“ дрес повторно ќе го облече пикерот Кристијан Анастасовски, кој е дете на Вардар.

Тој ќе биде замена за Михаил Аларов кој заминува од клубот на крајот од оваа сезона. Анастасовски во моментов е член на екипата на Тиквеш од Кавадарци, каде со успех настапува и беше забележан неговиот напредок.

„Чест и задоволство е да бидам дел од клуб каков што е Вардар. Таму ги започнав моите ракометни почетоци и среќен сум што сега повторно се враќам. Вардар е европски клуб со големи успеси зад себе. Се надевам дека заедно ќе имаме уште многу победи и успеси“, изјави Анастасовски.

Покрај за матичниот Вардар 1961, тој настапуваше и за екипите на Работнички, Охрид, Анжер (Франција) и Кастриоти (Косово). Анастасовски има настап и за младинската репрезентацја на Македонија на ЕП 2014 година. Неколкупати беше и на поширокиот список на сениорската репрезентација на Македонија.