Новата градинка во Расадник, која ќе прими 120 дечиња, се гради со полна пареа. Ова го констатираше градоначалникот на Општина Кисела Вода, Орце Ѓорѓиевски, по извршениот увид на градежните активности.
-Објектот ќе се простира на површина од 795 квадратни метри, ќе има шест занимални, од кои две ќе бидат наменети за јасли и ќе значи уште едно исполнување на барањата на жителите од овој дел на општината – истакна Ѓорѓиевски.
Овој објект се гради со поддршка на Владата.
-Со неговото завршување, како и со завршување на објектот „Верверичка”, кој е во завршна фаза, како и објектот во Потстаница, кој исто така е во напредна фаза, не само што целосно ги елиминираме листите на чекање за упис во градинките, туку ќе обезбедиме и поголем простор, комфор и подобри услови за децата од Кисела Вода, но и можност да примаме и дечиња од другите општини – заклучи Ѓорѓиевски.
