Општина Бутел ќе добие нов спортско рекреативен центар „Радишани“ кој ќе се наоѓа во истоимената населба, во дворот на ООУ „Ацо Шопов”.
Спортско-рекреативниот центар ќе се протега на површина од над 5.000 квадратни метри.
Во рамките на овој центар ќе биде изградено модерно фудбалско игралиште со вештачка трева, ќе биде поставена нова метална ограда и ново лед-осветлување, потоа ќе бидат изградени и баскет-игралиште со специјална подлога кое беше реконструирано во минатото и ново детското игралиште со нови модерни содржини и нова мека подлога.
Воедно, ќе биде реконструирана фитнес зоната за вежбање и рекреирање, а ќе има и нови зелени површини, пешачки патеки, урбана опрема, како и лед-осветлување.
-Ова е место, на кое во минатото пораснаа многу генерации, многу ученици и деца своето време го поминуваа на овие игралишта, но за жал изминатите години беше целосно запуштено и уништено – соопштија од Општина Бутел.
