Рускиот претседател Владимир Путин денеска изјави дека Москва се обидува да стави крај на конфликтот во Украина, додавајќи дека Русија може повторно да ја употреби ракетата Орешник доколку е потребно, но дека нема да брза да го стори тоа.
Тој посочи дека доколку е неопходно руската армија да користи помоќно оружје со среден дострел, тоа ќе го стори, пренесува РИА.
„Русија одговара реципрочно. Некој користи одредено оружје против нас, а потоа ние го користиме истото“, рече Путин.
Тој изјави дека главен приоритет на Русија е благосостојбата на нејзините граѓани.
Путин по средбата со словачкиот премиер Роберт Фицо изјави дека Словачка е подготвена да обезбеди платформа за преговори за Украина и дека Русија не е против таква опција.
Словачкиот премиер во неделата во Москва се сретна со рускиот претседател и разговараа за воената ситуација во Украина и можностите за мирно решавање на конфликтот, како и за билатералните односи, пренесува Танјуг.
