Путин неочекувано: Подготвен сум за директни преговори со Украина

Рускиот претседател Владимир Путин, под притисок на Вашингтон за да покаже дека е подготвен за мир во Украина, предложи во понеделник билатерални разговори со Киев за прв пат по неколку години и рече дека е отворен за почести прекини на огнот по краткото велигденско примирје.

Путин рече дека борбите продолжиле по неговиот изненадувачки 30-часовен прекин на огнот, кој тој еднострано го објави во саботата. Двете страни меѓусебно се обвинуваат за кршење на примирјето, што Киев во голема мера го отфрли како претстава.

Вашингтон соопшти дека ќе го поздрави продолжувањето на примирјето.

Украинскиот претседател Володимир Зеленски повика прекинот на огнот да се прошири во 30-дневно примирје во кое ќе бидат заштитени цивилните цели.

Обраќајќи му се на руски ТВ новинар, Путин рече дека Москва е отворена за какви било мировни иницијативи и дека истото го очекува и од Киев.

Отсекогаш сме имале позитивен став кон мирот и затоа дојдовме до ваква иницијатива, особено кога зборуваме за светлите велигденски денови“, рече Путин.

Запрашан за предлогот на Зеленски за 30-дневен мир, тој рече: „Сето ова е предмет на внимателно разгледување, дури и билатерално. Ние нема да го исклучиме ова“.

Неговиот портпарол Дмитриј Песков подоцна потврди дека Путин мислел на можноста за директни преговори со Украина. Двете страни не водеа такви преговори од неуспешните мировни напори во раните месеци од војната пред три години.

„Кога претседателот рече дека е можно да се разговара за прашањето за ненапаѓање цивилни цели, вклучително и билатерално, тој имаше на ум преговори и дискусии со украинската страна“, рече Песков, пренесе Интерфакс.

Трамп и државниот секретар Марко Рубио во петокот објавија дека Вашингтон ќе ги напушти мировните преговори за Украина доколку двете страни не постигнат напредок во рок од неколку дена.

Трамп испрати пооптимистичка порака во неделата, велејќи дека се надева дека двете страни ќе постигнат договор „оваа недела“.