Рускиот претседател Владимир Путин, повика на лов на предавници во своето обраќање пред руската Федерална служба за безбедност (ФСБ), откако доби нов претседателски мандат.
„Тие треба да бидат идентификувани и казнети“, рече Путин со изразено лут тон.
„Ќе ги казниме без временско ограничување, каде и да се“, рече тој, додавајќи дека Русија нема да ги заборави предавниците кои извршија злосторства против државата. Евидентирани се неколку случаи на убиства на Руси, некои од нив додека биле во странство, или смртни случаи во неразјаснети околности.
Путин конкретно се осврна на украинските напади на пограничниот регион Белгород, каде неодамна имаше цивилни жртви. Интензивни напади се случија во регионот за време на претседателските избори меѓу петокот и неделата.
Тој потсети на експлозиите на гасоводите „Северен тек“
Рускиот претседател зборуваше за тероризам чија цел беше да се наруши гласањето. Тој обвини „терористички и диверзантски групи“ кои дејствуваат заедно со украинските сили, платеници и други „ѓубриња“. Последново може да се однесува на руски државјани кои пребегнале на украинската страна.
Претседателот, исто така, ја повика ФСБ да соработува со другите разузнавачки служби во зајакнувањето на антитерористичките операции.
„Се соочуваме со силен и опасен противник кој има широк опсег на информации, технички и финансиски ресурси во својот арсенал“, рече Путин.
Тој потсети на експлозиите на гасоводите Северен тек 1 и 2 во Балтичкото Море во 2022 година. Исто така, неопходно е да се зајакне безбедноста на границите, на пример со зголемување на ефикасноста на мобилните единици, рече Путин.
Тој се осврна на копнените и поморските граници, вклучувајќи го и Црното Море, каде што украинските сили беа успешни против руската морнарица. ФСБ, меѓу другото, е одговорна за заштита на границите на Русија.
