Путин го чека одговорот на Маск за понуда што може да го промени светот

Рускиот економист Кирил Дмитриев, претставник на рускиот претседател Владимир Путин за меѓународна соработка, во четвртокот објави дека Русија му нуди соработка на Илон Маск во неговиот проект за патување на Марс.

Зборувајќи на маргините на Арктичкиот форум во Мурманск, Дмитриев посочи дека Москва може да придонесе во мисијата на Маск на Марс со својата напредна нуклеарна технологија.

„Русија може да понуди мала нуклеарна централа за мисија на Марс и други напредни технолошки способности. Ние веруваме дека Русија има многу да понуди за мисија на Марс, бидејќи имаме некои нуклеарни технологии за кои мислам дека би можеле да бидат применливи“, рече Дмитриев, додавајќи дека Русија „ja смета за важна“ соработката со Маск, кого тој го поздрави како „голем визионер“, пишува Јутарни.

Претставникот на Путин, кој исто така раководи со фонд кој работи на привлекување странски инвеститори, рече дека Москва може да разговара за понудата со Маск преку видео-конференција, а Ројтерс нагласува дека ова е „втор пат овој месец Дмитриев да зборува за потенцијална соработка со Маск“.

Првиот пат тоа се случи на 18 март, кога, како што објави украинскиот весник Киев Индипендент, Дмитриев за руските медиуми изјави дека очекува Русија да има разговор со Маск во блиска иднина и дека Русија бара соработка со компанијата на Маск SpaceX во развојот на руската вселенска агенција Роскосмос и државната компанија за нуклеарна енергија Росатом.