За првпат во Гевгелија ќе се одржи мултимедијалниот фестивал „Арт ум“, во организација на Здружението на граѓани „Арт ум 023“ од Гевгелија.
Во двата фестивалски дена, 21 и 22 јуни 2024 година, ќе се реализираат бројни активности како: изложби, работилници, уметнички перформанси и настапи на истакнати домашни и странски легенди на електронската музика.
Фестивалот ќе започне на 21 јуни, во Народниот театар – Гевгелија, со мултимедијална изложба на која ќе учествуваат четворица гевгелиски уметници препознатливи по својата автентичност: Перо Кованцалиев, Ице Капсаров, Александар Јанев и Мирјана Крстева-Масети, претставувајќи се со своите дела, инсталации и перформанси. Исто така, ќе се одржат и кратки работилници за генеративната уметност од архитектот Натали Василева и мастер-клас на тема „Кратка историја и вовед во електронската музика и основни на аналогна синтеца“, од продуцентот и диџеј Александар Гроздановски (Herzel).
На 22 јуни, во клубот „Де факто“, од 22:00 до 6:00 часот, ќе продолжи фестивалот со музичкиот дел. Десетчасовната програма ќе ја пополнат етаблирани изведувачи од електронската музичка сцена: Jimpster од „Freerange Records“, Лондон, UK и Samuel L Session од „SLS Records“, Гетеборг, Шведска. Ќе настапат и веќе познатите артисти од домашната електронска сцена: Tomi Bojadzi, Maci, Wish.Ko, Samoil Radinski, Soul Case, Berryqat, Joss и Mosaik Kollektif.
– По години музичко дејствување на локалната сцена, се подготвуваме да ви понудиме нешто посебно – „Арт ум фестивал“. Специјален настан каде што ќе може да се забавувате, инспирирате и да се поврзете со уметноста и со музиката. Мултимедијална програма со изложби, уметнички инсталации, работилници, и музички перформанси на етаблирани изведувачи од електронската музичка сцена. Придружете ни се за да бидете дел од почетокот на една нова традиција. Целта на овој фестивал е да се збогатат културните и социјалните аспекти на заедницата, како и креирање културна дестинација на Градот Гевгелија, која ќе привлече посетители од регионот и од целата држава. Со понудената програма на фестивалот, Градот би се позиционирал на мапата на фестивалскиот туризам и новите можност за туризам и локален економски развој – велат организаторите.
„Арт ум фестивалот“ е поддржан од Општина Гевгелија, преку програмата за финансирање програми и проекти од областа на културата за 2024 година.
