Промоција на книгата „Гледна точка“ од Јани Бојаџи во Кинотека

Во Кинотеката на Македонија, вечерва (21 jануари), со почеток од 19 часот, ќе се одржи промоција на книгата „Гледна точка“ на авторот Јани Бојаџи, македонски режисер, продуцент и сценарист. Водител на настанот ќе биде Александар Русјаков, искуства ќе споделат и неколку актери, директори на фотографија и монтажери, соработници на Бојаџи, а ќе има можност и за прашања и одговори од публиката кон авторот.  Ќе биде покажан и трејлер од долгочекуваниот нов проект „Утре наутро“!

-Книгата „Гледна точка“ навидум зборува за работи за кои зборуваат, повеќе или помалку, на овој или оној начин, и сите многубројни учебници по режија и слични прирачници: основите на филмската режија, работата на режисерот, соработката со кинематограферот, со продуцентите, актерите итн. Но, она што ја прави оваа книга посебна, специфична, е тоа што таа е сосема лично видување на авторот на сите овие процеси, кое произлегува од неговото образование и досегашното работно искуство на филмот и телевизијата. Оттаму, и јазикот на книгата е искрен, отворен и авторот без задршки, храбро, анализира многубројни теми кои влегуваат во неговиот фокус, изнесувајќи сосема лични ставови и констатации. Оттаму, не случајно и книгата завршува со ставот на авторот: „Ова е мојата гледна точка!“, посочува д-р А. Чуповски кон книгата.

Јани Бојаџи е познат македонски режисер, продуцент и сценарист, кој зад себе има повеќе од десетици филмски и телевизиски проекти. Тој е доктор на науки, професор по филмска и телевизиска режија на Интернационален универзитет Europa PRIMA. Во 2023 година, Бојаџи станува основач на платформата „Кинемое”, која е наменета за македонска продукција за филмови и серии. Тој е директор на Фестивалот „Преку езерото“, кој се одржува еднаш годишно во Дојран од 2023 година.