Ричард Бренсон, британскиот милијардер и сопственик на Вирџин Атлантик, остро ја критикуваше американската влада за нејзиното ненадејно воведување нови царини, велејќи дека реакцијата на пазарот на потегот е „и предвидлива и можела да се спречи.
Во серијата објави на социјалната мрежа Х се предупреди на сериозни последици за американската и светската економија.
„Дури и ако се согласувате со основната идеја на овие царини, требаше да се направи се за да им се овозможи на американските компании доволно време да се приспособат“, напиша Бренсон.
Тој вели дека пазарите реагирале панично, а последиците се веќе видливи.
Со глобалните пазари во слободен пад и ослабен долар, Бренсон предупреди дека „може да се случат катастрофални резултати за обичните Американци, како и за остатокот од светот“, вклучувајќи ги американските потрошувачи кои се соочуваат со повисоки трошоци и средните бизниси соочени со банкрот.
Исто така, тој нагласи дека една од најважните лекции што ги научил во повеќе од 60 години бизнис е способноста да препознаеш кога грешиш и да го смениш правецот.
„Со брзо враќање на здравата економска политика, Америка и остатокот од светот сè уште можат да ги избегнат катастрофалните последици што ќе ги предизвикаат овие царини. Како што слабее доларот, цените во САД ќе растат. И безброј мали и средни бизниси ќе банкротираат како резултат.
Тој заклучи дека е време да се признае „колосалната грешка“ и да се смени курсот, во спротивно, како што тврди, Америка „со години ќе ги сноси последиците од овој потег“.
