„Приватно не се дружам со естрадните ѕвезди, нема искрени, но никој не ме повредил!“

Поп-пејачот Бојан Маровиќ во Буљарица, на Јадранското Море, другарува со обичниот свет!

Црногорскиот пејач Бојан Маровиќ добро го познаваме и ние, во Македонија. Тој беше голем другар со нашиот Тоше. Секој октомври, месецот во кој трагично загина Тоше, Бојан е во Крушево, каде што на неговиот гроб, покрај запалената свеќа, му праќа и безброј емотивни пораки.

Бојан деновиве се подготвува да пее на обновениот забавно-музички фестивал „Белградска пролет“, на кој ќе настапат и некои пејачи од Македонија. Но, пред тоа, тој е на Јадранското море, во познатата Буљарица, каде што го наоѓа својот душевен мир.

– Во Буљарица, на Јадранот, пораснав со тие обични луѓе. Таму сум свој на своето во секој поглед. Дури и брадата не ја бричам, тотално сум опуштен. Само море, палми, мојот пес, тишина, мир. Во Буљарица сум често и со својата долгогодишна љубов, мојата девојка. Таа е заштитена од медиумите и од љубоморните новинари. Тоа е мојата приватност, мојата оаза. Има време за брак.                                                      Не сакам мојот брак да трае десет дена, да се залетувам. Како што минуваат годините така најмногу сакам да го поминувам времето таму, на море. Никогаш не ги прифатив брзиот живот, популарноста и естрадниот метеж. Приватно, не се дружам со тие ѕвезди. Во принцип, естрадата е и кретенска работа и воопшто не е искрена. Има луѓе што многу ги почитувам, добро ми е со нив, и тоа е тоа. Досега, никој не ме повредил толку многу од колегите за да не сакам муабет со него. (Д.М.)