Австралискиот премиер, Ентони Албанезе, новите американски царини ги нарече целосно неоправдани, истакнувајќи дека тие ќе ја променат перцепцијата за односите меѓу САД и Австралија, инаку блиски сојузници. Австралија доби царинска стапка од 10 отсто, а министерката за надворешни работи, Пени Вонг, предупреди дека овие мерки ќе имаат значително влијание врз стратешки важниот индопацифички регион, додавајќи дека Австралија ќе одговори со сериозност и зрелост. Сепак, Албанезе нагласи дека Канбера нема да преземе контрамерки, велејќи: „Пријателите не прават вака“.
Ирскиот премиер, Михол Мартин, изјави дека не гледа никакво оправдување за царините на Трамп и најави дека Ирска, заедно со партнерите во Европската Унија, ќе разгледа како да одговори на пропорционален начин, заштитувајќи ги интересите на европските компании, работници и граѓани.
– Судирот никому не му користи – нагласи тој, додавајќи дека Ирска ќе се залага за решенија што ќе ги зајакнат трансатлантските трговски врски.
Британскиот министер за претприемништво и трговија, Џонатан Рејнолдс, коментираше за царините од 10 % на увозот од ОК, велејќи дека Владата е фокусирана на преговори за економски договор со САД што ќе ги зачува „чесните и балансирани“ трговски односи. “САД се нашиот најблизок сојузник“, рече тој.
Тој додаде дека пристапот треба да остане смирен, но дека ништо не е исклучено и дека Владата ќе го брани националниот интерес доколку е потребно.
– Никој не сака трговски војни, но имаме алатки и нема да се двоумиме да дејствуваме – предупреди Рејнолдс.
Швајцарската претседателка, Карин Келер-Сутер, на платформата X објави дека земјата брзо ќе одлучи за следните чекори откако САД воведоа царини од 31 отсто на швајцарската стока, означувајќи ја Швајцарија како еден од „најлошите прекршители“. Во 2024 година, САД извезле стока во Швајцарија во вредност од 25 милијарди долари, додека увезле 63,4 милијарди, создавајќи голем трговски дефицит. Американската администрација, во својот годишен извештај, ја опиша Швајцарија како протекционистичка земја што користи високи субвенции, увозни рестрикции и царини за да го поддржи својот земјоделски сектор.
– Долгорочните економски интереси се приоритет, заедно со почитувањето на меѓународното право и на слободната трговија – напиша Келер-Сутер.
Полскиот премиер, Доналд Туск, пак објави на X: „Пријателството значи партнерство. Партнерството значи реални и вистински реципрочни тарифи. Потребни се соодветни одлуки“.
Италијанската премиерка, Џорџа Мелони, за која се смета дека е блиска до американскиот претседател, Трамп, изјави дека царините наметнати од неговата администрација се погрешни и дека нема да бидат од корист за САД.
– Ќе направиме сè што можеме за да постигнеме договор со САД, со цел да се избегне трговска војна, која неизбежно ќе го ослаби Западот во корист на другите светски играчи – порача Мелони во објава на „Фејсбук“.
Во секој случај, додаде таа, како и секогаш, ќе дејствуваме во интерес на Италија и нејзината економија, соработувајќи со другите европски партнери. Таа изрази надеж за соработка меѓу Европа и САД за да се избегне ескалација.
Шведскиот премиер, Улф Кристерсон, рече дека не сакаат постојано зголемување на трговските бариери, а шпанскиот премиер, Педро Санчез „Шпанија ќе ги заштити своите компании и работници и ќе продолжи да му биде посветена на отворениот свет“.
Данскиот шеф на дипломатијата Ларс Локе Расмусен, посочи во изјавата дека не може да сфати зошто сакаат САД да започнат трговска војна против Европа.
– Никој не победува, сите губат. Наместо да градиме ѕидови, треба да ги уриваме бариерите. Европа ќе остане обединета. Европа ќе обезбеди силни и пропорционални одговори – рече тој.
Манфред Вебер, претседател на најголемата партија во Европскиот парламент, Европската народна партија, истакна: “Американски пријатели, денес не е ден на ослободување, туку ден на незадоволство. Тарифите на Доналд Трамп не ја бранат фер трговијата, туку ја напаѓаат од страв и им наштетуваат на двете страни од Атлантикот. Европа е обединета, подготвена да ги брани своите интереси и отворена за искрени, цврсти разговори“.
Новиот канадски премиер, Марк Карни, тврди дека Трамп зачувал голем број важни елементи на комерцијалните односи меѓу Канада и САД. Тој оцени и дека реципрочните царини на Трамп суштински ќе го променат меѓународниот трговски систем.
Министерот за трговија на Нов Зеланд, Тод Меклеј, изјави дека интересите на Нов Зеланд најдобро ги опслужува свет во кој трговијата тече слободно. Привремениот претседател на Јужна Кореја, Хан Дак Су, истакна дека, со оглед на тоа што глобалната трговска војна стана реалност, Владата мора да ги вложи сите свои капацитети за да ја надмине трговската криза. Тој нареди итни мерки за поддршка за компаниите што ќе бидат погодени од американските тарифи од 25 отсто, вклучително и за автомобилите, и побара од министерот за индустрија активно да преговара со Вашингтон за да се намали влијанието на тарифите.
Бразилското Министерство за надворешни работи соопшти дека бразилската Влада жали за одлуката донесена од северноамериканската Влада, која наметнува дополнителни царини до 10 отсто за целиот бразилски извоз. Кинеското Министерство за трговија ги повикува САД веднаш да ги отповикаат овие еднострани царински мерки и соодветно да ги решат трговските спорови преку дијалог со своите партнери.
– Кина цврсто се противи на овој потег и ќе преземе решителни контрамерки за да ги заштити своите права и интереси – рече портпаролот.
Кина е, можеби, најмногу погодена од денешната одлука на Трамп, бидејќи е воведена дополнителна царина од 34 отсто за сите кинески стоки, покрај постојните 20 проценти.
