Премиерот тврди дека имало кривично дело при купопродажбата на деловен простор од 409 метри квадратни по цена од 721 евра за метар квадратен, иако тој вреди најмалку три пати повеќе. Лидерот на Левица одговори дека купиле подрумски простории со приземје и затоа сумата била толкава.
Обвинување за криминална купопродажба на голем деловен простор и повик до МВР и Финансиска полиција да спроведат истрага против политичката партија Левица и нејзиниот лидер Димитар Апасиев упати денеска македонскиот премиер Христијан Мицкоски. Тој го најави ова додека одговарал на пратеничкото прашање на Апасиев во македонскиот парламент на седницата на која владините претставници одговараа на прашањата на опозициските пратеници. Лидерот на Левица во своето прашање кажа дека премиерот Мицкоски со своите настапи околу истрагата за ужасниот пожар во кочанската дискотека ја загрозил истрагата и ја попречувал правдата. Тој посебно го потенцира фактот дека Мицкоски и Владата прво покренале постапка за смена на државниот јавен обвинител, а потоа ја запреле постапката.
-На првата прес-конференција ја компромитиравте истрагата со објавување службен документ. Го повредивте и правилото на пресумпција на невиност. Бевте обвинител но и бранител на вашиот Папазов… Направивте кривично дело за одавање службена тајна. Вие ја попречивте и правдата. На 18 февруари почнавте постапка за разрешување на Јавниот обвинител Љупчо Коцевски. А потоа ова го одложивте, тоа е нудење или давање корист. Ова е алашвериш, нема да го обвиниш нашиот а јас ќе те оставам на функција. До кога ќе ги штитите вашите корумпирани вмровски кадри? – рече Апасиев.
Одговарајќи на прашањето, премиерот Мицкоски го обвини Апасиев дека купил деловен простор по ниска цена а во центарот на Скопје, како и дека сторил кривично дело и ги повика институциите да го истражат.
-Политичката партија Левица купила деловен имот од 409 метри квадратни на адвокатската улица, зад седиштето на компанијата А1, верувале или не, за цена од 295.000 евра со ДДВ. Или, просечно квадратот на овој објект е 721 евро во центар на Скопје. За какво кривично дело е ова, професоре? Сега ќе ви кажам. Градот Скопје ви пресметал дека ова кривично дело, кое го зборувам е еднакво на цена квадрат од 1.150 евра, па сте платиле данок во вредност од 739.285 денари. Ова кривично дело е, некое кривично цело, ќе видиме, ќе се позанимаваат органите. Ова дело е преку Универзална инвестициона банка – рече Мицкоски, покажувајќи истовремено фотографија од повеќекатницата на која што е купен просторот.
Потоа Мицкоски покажа и фотографија од деловниот центар „Соравија“ во центарот на Скопје.
-Што е заедничко помеѓу ова и ова? Извршителот Андреја Буневски. Тој е заеднички извршител за двата објекти. За „Соравија“ очигледно не успеа бизнисот и е закажано јавно наддавање и проценета на 22,4 милиони евра, па имам дилема, дали како што го купивте овој деловен објект, а сте неподмитливите, ќе наддавате и за „Соравија“ од 22,4 милиони евра – додаде Мицкоски.
Мицкоски очекува истражните органи да утврдат дали има основ за кривично дело.
-Ги повикувам МВР, Финансиска полиција и институциите да проверат дали има основа за кривично дело и дали Левица сторила кривично дело така што купила простор по цена од 721 евра за метар квадратен, а тој простор всушност вреди најмалку три пати повеќе? А од друга страна, Град Скопје тврди дека овој простор вреди најмалку 50 отсто повеќе од сумата што е платена. Господине Апасиев, кога станува збор за кривични дела, се надевам дека органите ќе имаат можност длабински да истражат што е тоа што претставува кривично дело, но тоа што јас можам да ви го кажам е дека со криминалците нема играње, вклучително и со оние кои се потенцијални криминалци. Без разлика од која политичка партија доаѓаат, дали се од СДСМ, дали се од ДУИ, Левица или од ВМРО-ДПМНЕ – истакна Мицкоски.
Својот одговор Апасиев го започна така што Мицкоски го нарече „северномакедонски премиер“, а рече дека Левица купила подрумски простории со приземје и дека тоа е причината за ниската цена.
„Почитуван премиер, прво, Димче може да ме вика само мајка ми, а не вие. Така и јас можам вас да ве викам Мицика. Второ, ова што го правите е синдром на дива коза или на вербална дијареја. Зборувате за сè освен за тоа што ве прашав. А тоа што ве прашав е всушност констатација дека вашите часовници вредат повеќе од таа зграда. Ние купивме подрумски простории со приземје, ете затоа е толкава сумата. Уште утре да ни поднесете кривична пријава, исто како што јас следната недела ќе поднесам против вас. Па нека ме повикаат во полициска станица и оној вашиот министер за внатрешни работи Панче Тошковски нека дојде да ме испрашува. А замислете, сето ова го кажува премиер на партија која е побогата од партијата на Ангела Меркел. Само за струја илегалната „Бела палата“ месечно плаќа по 10.000 евра. Скријте се таму и немојте вие да зборувате за чесност“ – одговори Апасиев, додавајќи дека ќе поднесе кривична пријава против Мицкоски. (Б.Ѓ.)
