Јапонскиот премиер Шигеру Ишиба изјави дека едвај чека да се пресели во неговата официјална резиденција и покрај долготрајните гласини дека зградата е опседната со духови.
Ишиба, избран во октомври по оставката на Фумио Кишида, го одложи потегот поради мали градежни работи, но се очекува наскоро да се пресели, иако тој одби да прецизира датум од безбедносни причини.
„Не се плашам“, одговори Ишиба на прашањето за духовите во резиденцијата, додавајќи дека би сакал да се всели што е можно поскоро. „Можеби е страшно да се види нешто, но тоа не е нешто за што сум загрижен“.
Резиденцијата во која се наоѓа кабинетот на премиерот е изградена во 1929 година, а во 1932 година таму е убиен тогашниот премиер Цујоши Инукаи. Сопругата на поранешниот премиер Цутому Хата напиша во мемоарите од 1996 година дека чувствувала морничаво и угнетувачко присуство додека живеела таму.
Зградата беше реновирана во раните 2000-ти и служи како официјална резиденција на премиерот од 2005 година.
Поради одложувањето на преместувањето на поранешниот премиер Шинзо Абе во 2013 година, владата мораше да негира дека локацијата е опседната. Шинзо Абе на крајот одлучи да не живее таму, а истото го направи и неговиот наследник Јошихиде Суга.
Кога Кишида се преселил таму во декември 2021 година, го прашале за духовите, но тој одговорил дека не ги видел и дека мирно спиел цела ноќ.
