Предлог за примирје меѓу Израел и Хамас повторно на маса

Палестинската милитантна група Хамас соопшти дека го поддржува продолжувањето на прекинот на огнот во Појасот Газа според предлогот на посредникот според кој пет заложници ќе бидат ослободени и предадени на Израел во замена за 50-дневен прекин на огнот.

Калил ал-Хаја, највисокиот функционер на Хамас надвор од Газа, вели дека групата го одобрила нацрт-предлогот испратен од посредници од Катар и Египет.

Израелскиот премиер Бенјамин Нетанјаху вели дека и неговиот кабинет го добил планот и дека поднеле „контрапредлог до посредниците во целосна координација со САД“.

Доколку се постигне договор, новото ограничено примирје може да се совпадне со почетокот на муслиманскиот празник Бајрам.

Во саботата во кабинетот на премиерот Нетанјаху се одржаа консултации во врска со предлогот на посредникот.

По состанокот беше објавено дека е договорена контрапонуда со САД, но не беа понудени детали за тој предлог. Американските власти не го коментираа ова прашање.

Овој предлог за прекин на огнот доаѓа откако Израел започна копнена операција во Рафа и продолжи со воздушните напади низ Појасот Газа, по завршувањето на примирјето што беше во сила од 19 јануари.

Двете страни не успеаја да постигнат договор за втората фаза од преговорите кога заврши првата фаза.

Како дел од првата фаза, Хамас ослободи 33 заложници. Се верува дека групата, која е поддржана од Иран, држи уште 59 заложници, иако се смета дека не сите се живи.

Хамас претходно инсистираше на првичниот договор, што значи дека преговорите за втората фаза од ослободувањето на сите преостанати заложници ќе доведат до целосно повлекување на израелските воени сили од Газа. Но тие преговори не беа започнати.

Наместо тоа, Израел и САД предложија продолжување на едномесечниот прекин на огнот, без јасни гаранции за тоа кога војната ќе заврши.

Израел го обвини Хамас дека одбива да го продолжи примирјето и на 18 март продолжија воздушните напади врз Газа.

Повеќе од 900 луѓе ширум областа се убиени во воздушни напади од тогаш, според Министерството за здравство на Хамас.

Во исто време, семејствата на преостанатите заложници го обвинија Нетанјаху дека им ги загрозил животите со кршење на примирјето.

Прикажана е снимка од заложникот Елкан Бобот, направена од членови на Хамас, во која тој бара ослободување.