Пратениците „очи си вадат“ – чија правда повеќе тежи!

Истрагата за катастрофалниот пожар во кочанската дискотека „Пулс“ во фокусот на пратеничките прашања кои на министрите им ги поставуваа пратениците од опозицијата  седницата во Парламентот. Не изостана прашањето за притворениот телохранител на премиерот, опозицијата праша кој му дал доверливи документи, ако е познато дека тој како вработен во 6. Управа нема пристап до такви информации. Министерот за полиција возврати, дојде време кога секој што се огрешил ќе одговара.

Опозицијата од собраниската говорница го повика министерот за полиција Панче Тошковски да си поднесе оставка откако тоа не го направи на 16 март веднаш по катастрофалната несреќа во кочанската дискотека „Пулс“, во која настрадаа 59 луѓе, а повеќе од 200 останаа повредени.

– Имавте шанса на 16 март вечерта да поднесете неотповиклива оставка, но бидејќи тоа не го направивте, еве сега имате можност тука, пред македонското Собрание и пратениците што ве избраа, и пред претседателот на Владата што ве предложи, да си поднесете неотповиклива оставка, од морални причини, поради пропусти, но и затоа што не дадовте никакви одговори за фактите што ви ги дадовме во Собранието, поврзани со трагедијата, повика на оставка пратеникот од СДСМ, Миле Талески, кој претходно му постави прашање на Тошковски, зошто ниту еден командир, инспектор, началник или повисок функционер на МВР од ОВР Кочани, СВР Штип или БЈБ, кои кога се случил настанот биле на функции, не е меѓу приведените или опфатените со истрагата. Талески покажа фотографија од партиски состанок на којшто се гледа дека присуствува началникот на крим- полицијата во Кочани, Томо Донев.

Министерот Тошкоски ја обвини опозицијата дека лаже и манипулира, потсети дека во досегашната истрага поднесени се две кривични пријави против 34 луѓе и три фирми, за разлика од случаите во минатото кога тогашната власт на СДСМ и ДУИ, според министерот, воопшто не постапувале по несреќите во модуларната во Тетово, Ласкарци и автобусот на Беса транс.

– Знаете колку кривични пријави поднесе МВР и против колку луѓе за трагедијата во Модуларната болница во Тетово? Јас ќе ви кажам: нула. Знаете колку кривични пријави поднесе МВР за трагедијата во Бугарија? Ќе ви кажам и тоа: нула. Знаете колку кривични пријави има за Ласкарци? Нула. Е сега, во овој предмет, МВР процесуираше кривични пријави за 34 физички лица и за 3 правни лица, меѓу кои има членови на ВМРО-ДПМНЕ, СДСМ, ДУИ, и ниеден од нив не е во оваа постапка затоа што е член или не е член на одредена политичка партија. За разлика од тоа што претходно овој орган бил должен да процесуира одредени надлежности, кои ги има согласно законот, а не ги процесирал, за разлика од вас кој суди и манипулира со приказни, јас говорам со факти – возврати на прозивките од опозицијата Тошковски.

Парламентарните групи во Собранието ќе поднесат барање до спикерот Африм Гаши за формирање на Анкетна комисија за несреќата во Кочани, најави пратеникот на ДУИ, Блерим Беџети, кој се сомнева во правичноста, во истрагата и ја обвини власта дека политички игра со случајот.

-Зошто Владата е фокусирана само на едно име во истрагата, поранешниот министер Бектеши, дали ова не е политичка одмазда и дали ќе бидат гонети сите виновници, праша Беџети на што Тошковски возврати дека и семејствата на настраданите во несреќите од минатото не веруваат дека кабелот бил крив што изговорот станал синоним за нивното владеење.

Министерот Тошковски се повика на  прес конференцијата на семејствата на жртвите од модуларната болница, кои од пред Основниот суд во Тетово, каде што се одржуваше повтореното судење за двајцата директори на болницата, побараа обвинителството да ја повтори истрагата за несреќата, во која изгореа 14 пациенти.  Според семејствата постојат сериозни докази за кои сметаат дека Обвинителството ги има отфрлено во досегашната постапка пред судот.

– Целата јавност знае дека постојат сериозни докази за пропусти при изградбата на модуларната болница кои можат да бидат единствени причини за пожарот. Тоа беше потврдено и со германското вештачење-независен и кредибилен доказ кој за жал беше отфрлен од обвинителството. Затоа, драг Љупчо,(Љупчо Коцевски) како наш сограѓанин од Тетово, Вие најдобро ја разбирате болката и гневот на семејствата на жртвите и на целата заедница. Ова не е само правно прашање. Ова е морална обврска – кон тие што ги изгубивме, но и кон сите граѓани што денес живеат со страв дека ова може да се повтори, а никој нема да одговара, истакна Агрон Арифи од Иницијативата „Нула“, во име на семејствата на жртвите.

Како завршиле доверливите документи во рацете на Самараков?

Опозицијата, денеска, на пратеничките прашања, наменети за владините министри, го праша Панче Тошковски кој му ги дал доверливите документи на Ангел Самараков кој пак како вработен во 6. Управа немал пристап до такви информации и дали безбедносниот систем во државата функционира. СДСМ побара итна постапка за расчитување на случајот со телохранителот на Мицкоски.

-Ова е случај кој покажува дека МВР се бори неселективно и оти секој што се огрешил ќе одговара.  Одделот за внатрешна контрола во рамки на спроведување на истрагата известил Јавен обвинител, кој се согласил да бидат преземени дејствија веднаш. Извршени се повеќе претреси кај тројца полициски службеници и најдени се докази кон кривичното дело, одговори министерот Тошковски

Личното обезбедување на премиерот заврши во притвор поради оддавање на службена тајна. Бил фатен на дело во продажба на доверливи документи за 50 илјади евра. Според информациите во јавноста за него и претходно постапувала внатрешната контрола. Премиерот Мицкоски вчера потврди дека обезбедувањето бил негов личен избор. (П.А.)