Познато е кога Дончиќ ќе излезе на терен во дресот на Лејкерс

Откако кошаркарскиот свет го потресе трејдот на Лука Дончиќ од Далас во Лос Анџелес Лејкерс, сите го чекаат неговото деби со новиот тим. Словенецот веќе следеше два натпревара од клупата покрај своите нови соиграчи и ги гледаше победите против Лос Анџелес Клиперс и Голден стејт.

Навивачите се надеваат дека ќе го видат Дончиќ во неговиот нов дрес во сабота навечер, кога Лејкерси се домаќини на Индијана (22 часот по средноевропско време).

Сепак, тренерот на Лејкерси, Џеј Џеј Редик, изјави дека не сака да избрзува со ништо и дека ќе му даде доволно време на лекарскиот тим да се погрижи Дончиќ целосно да закрепне од повредата со која се мачи повеќе од еден месец.

• Најверојатно во понеделник. Не е 100 отсто сигурно, но одиме кон тоа. Сè е добро. Се надевам дека ќе добијам потврда во следните неколку дена. Сите сакаме да го видиме во дресот на Лејкерс, изјави Редик.

Според зборовите на Редик, Лејкерси во понеделник вечер ќе играат против Јута, кога Дончиќ се очекува за првпат да излезе на терен во дресот на „езерџиите“.