Пожарот одложи голем број филмски премиери во Лос Анџелес, откажан биографскиот филм за Роби Вилијамс

„Парамаунт“ ја откажа премиерата на филмот на Роби Вилијамс „Подобар човек“ (Better Man) кој требаше да се одржи во среда навечер во Лос Анџелес, поради големиот пожар во Лос Анџелес.

„Нашите мисли се со сите погодени од разорните пожари и ги повикуваме сите да останат безбедни и да ги следат инструкциите на локалните власти“, соопшти Парамаунт.

Филмот, во режија на Мајкл Грејси, го следи животот на британската поп ѕвезда Роби Вилијамс. Филмот оди во широка дистрибуција овој петок во околу 1.200 кина.

Во филмот, Вилијамс е толкуван од мајмун. Критиките се убедливо позитивни, со 90 проценти сертифицирани свежи рецензии и оценка од публиката со 96 проценти позитивни коментари.

Познатиот пејач беше вклучен во развојот на сценариото и снимањето на филмот во кој се игра себеси како возрасен, а создаде и своја листа на песни кои ја дефинираа неговата кариера и ја сочинуваат плејлистата за филмот „Подобар човек“.

Меѓу нив се најголемите хитови како „She’s The One“, „Angels“ и „Let Me Entertain You“, а оригиналната музика за филмот ја компонираше Бату Сенер.

Universal ја откажа светската премиера на хорор филмот на Blumhouse, Wolf Man, додека Amazon ја откажа премиерата на филмот на Џенифер Лопез, „Unstoppable“ во Лос Анџелес.

Нетфликс го одложи музичкиот настап и коктел настанот на Емилија Перез што требаше да се одржи синоќа, а нов датум допрва треба да се одреди.

Наградите SAG не ја одржаа најавата за номинации во живо, туку објавија соопштение за печатот со списокот на номинирани.