Огромно мнозинство Американци се загрижени дека би можеле да ги загубат своите работни места оваа година, покажува новото истражување на пазарот на трудот, пренесе Индекс.хр.
Извештајот насловен „Големото задржување: Состојба на пазарот на трудот 2025“, спроведен од платформата „Мојаата совршена биографија“, ја открива растечката несигурност меѓу работниците во САД. Според истражувањето спроведено на примерок од 1.115 вработени, дури 81 отсто од испитаниците стравуваат дека ќе останат без работа оваа година, а 20 отсто од нив велат дека се „многу позагрижени“ од минатата година, пишува Newsweek
Масовни отпуштања
Луѓето се помалку ги менуваат работните места бидејќи се загрижени за отпуштања и можна рецесија. Дури 76 отсто од испитаниците очекуваат повеќе отпуштања во 2025 година, а дури 92 отсто веруваат дека доаѓа рецесија. Речиси две третини (63%) сметаат дека годинава ќе затворат повеќе компании отколку лани.
Загриженоста не е неоснована. Во март, американските работодавци објавија 275.240 отпуштања – повеќе отколку во истиот месец пред пет години, кога избувна пандемијата, според извештајот на фирмата за регрутирање „Челинџер, Греј и Крисмас“.
Од нив, дури 216.215 отпуштања доаѓаат од федералната администрација. Во изминативе два месеци вкупно 280.253 лица се отпуштени во 27 владини агенции. Главниот двигател на овој бран отпуштања е новоформираниот Оддел за владина ефикасност, неофицијално на чело со Илон Маск, а има за цел намалување на владината бирократија и трошоци.
Во однос на бројот на отпуштања, март беше најлошиот месец од историските кратења во април и мај 2020 година, кога повеќе од милион луѓе останаа без работа поради пандемијата, според податоците што ги следи „Челинџер“ од 1989 година. „Тоа не е само страв од отпуштања. Луѓето се плашат дека системот ќе ги заборави“.
„Повеќе ништо не е безбедно“
Патрис Вилијамс Линдо, извршна директорка на Career Nomad, вели дека луѓето не драматизираат, туку само следат што се случува. „Отпуштањата сè уште се случуваат редовно, иако се непредвидливи. Економијата изгледа нестабилна. Царините постојано се менуваат. Вестите не запираат. Работниците се уморни да бидат изненадени од нештата, а таа вознемиреност се чувствува“, изјави Линдо за „Њузвик“.
Претприемачката и бизнис тренер Адријана Л. Каудин вели дека ситуацијата не е без преседан, но дека е „особено дестабилизирачка“, бидејќи дури и стабилните институции – како сојузните влади – „даваат знаци дека повеќе ништо не е сигурно“.
„Видов како политичките и економските промени ја менуваат перцепцијата за безбедноста – од падот на „dot-com“ во 2000 година, преку 11 септември, финансиската криза во 2008 година и сè до пандемијата. Кога ќе исчезне чувството за предвидливост, луѓето прашуваат: ако веќе не можат да се потпрат на пазарот, државата или големите компании – тогаш на што можат да се потпрат? рече Каудин.
Психичкото влијание на отказот
Иако стапката на невработеност во САД останува ниска, големите медиумски и технолошки компании кои неодамна отпуштија голем број работници создаваат психолошки притисок, вели Сем Рајт од Хантр, компанија за пишување резимеа и следење на апликации за работа.
„Секогаш кога голема компанија најавува отпуштања, гледаме зголемување на активноста на нашата платформа, дури и од сектори кои не се поврзани со индустријата од кои доаѓаат вестите“, изјави Рајт за „Њузвик“.
Несигурноста при работа предизвикува и поголем стрес. Повеќе од половина од испитаниците (52%) очекуваат исцрпеноста да биде уште почеста. Како главна причина се наведува несигурноста при работа (43%).
За да останат конкурентни, 61 процент од работниците планираат дополнително да инвестираат во образование и обука во текот на 2025 година. Линдо вели дека тоа повеќе зборува за недоверба во системот отколку за лошата состојба на пазарот. „Пазарот на трудот не се распаѓа, но довербата на луѓето во него пропаѓа. Тоа навистина го покажуваат овие податоци“, рече таа.
Каудин додава дека сегашната паника можеби нема да трае, но дека работниците ја прават вистинската работа со тоа што се подготвуваат и работат на себе. „Најпаметно е да не се замрзнете од страв“, рече таа. „Работете на вашиот личен бренд, ажурирајте го профилот на LinkedIn, разговарајте со тренер или терапевт, останете присутни на работа – дури и ако работите од дома – и грижете се за вашиот начин на размислување. Не дозволувајте стравот да ја диктира вашата судбина.
