Потешко до работа во Германија: Владата на  Мерц има план квотата за работници од Западен Балкан да ја намали за 25.000 луѓе

Во 2024 година, т.н. семафорска влада на Олаф Шолц, не само што го продолжи правилото за Западен Балкан, туку и ја зголеми квотата за давање работни визи од 25.000 на 50.000 годишно. Во новиот документ на работната група за труд и социјални прашања во преговорите за формирање влада нема ниту збор за регулативата за Западен Балкан, но во претходниот преговарачки документ се наведува имиграцијата од тој регион од 50.000 да се ограничи на 25.000 луѓе годишно.

Новата германска влада што се очекува да ја формира Фридрих Мерц, би можела да го ограничи таканареченото правило за Западен Балкан, кое им овозможува на жителите на повеќе балкански земји да одат на работа во Германија, пишува е „Тагесцајтуг“.

Експертите велат дека на Германија ѝ се потребни работници и тоа најмалку 400.000 годишно. Една од можностите тие луѓе да дојдат во Германија е таканареченото правило за Западен Балкан. Но, под новата влада со Мерц начело, тоа правило би можело значително да се ограничи.

Посебните прописи, таканаречени правило за Западен Балкан им овозможуваат на луѓето од Албанија, БиХ, Црна Гора, Македонија и Србија да одат на работа во Германија без никакви проблеми. За тоа не им е потребно стручно образование или квалификација. Доволно е само да имаат понуда за работа и одобрение од Федералната агенција за труд и вработување.

Правилото е воведено во 2015 година со цел да се намали бројот на барања за азил од овие земји и да им се даде можност на луѓето редовно да пристапуваат до пазарот на трудот. Оттогаш, бројот на барања за азил од земјите од Западен Балкан значително се намали. „Тагесцајтуг“ наведува дека мигрантите од овој дел на Европа често работат во медицинскиот и градежниот сектор, рестораните и хотелите. Во 2024 година, т.н. семафорска влада на Олаф Шолц не само што го продолжи правилото за Западен Балкан, туку и ја зголеми квотата за давање работни визи од 25.000 на 50.000 годишно.

Новата германска влада што допрва треба да се формира речиси сигурно ќе ја предводи Христијанско-демократската унија (ЦДУ) на Фридрих Мерц, а во моментов се водат коалициски преговори со социјалдемократите од СПД. Но, на изненадување на сите, во документот на работната група за труд и социјални прашања не се најде ниту еден збор за регулативата за Западен Балкан, пишува германскиот весник. Наведува и дека во претходниот преговарачки документ стоело дека преку тоа правило се сака имиграцијата од Западен Балкан, повторно да се ограничи на 25.000 луѓе годишно.

Партијата на Мерц, ЦДУ не сакала за „Тагескејтунг“ да ги коментира тековните преговори, а СПД не одговорила до затворање на изданието на тој весник.

Економскиот експерт Херберт Брикер од Институтот за истражување на пазарот на труд и занимања (ИАБ), кој ги оценуваше ефектите од доаѓањето на работната сила од Западен Балкан, смета дека укинувањето на тоа правило не би било добра идеја, бидејќи, како што вели, овие луѓе „многу добро се снаоѓаат на пазарот на трудот“. Три до четири години по пристигнувањето во Германија, околу 95 отсто од нив сè уште се вработени, покажуваат податоците на Институтот.

-Во однос на стапката на вработеност, тие постигнуваат подобри резултати од која било друга група имигранти на пазарот на трудот. Всушност, тие се многу поуспешни од многу домашни работници, вели Брикер за „Тагескејтунг“.

Тој додава дека луѓето од Западен Балкан речиси воопшто не користат социјална помош, а нивото на квалификации е повисоко од очекуваното. Покрај тоа, иако правилото за Западен Балкан не бара никакви квалификации, повеќето имигранти во Германија вршат квалификувана работа.

-Таму имаме редовни работни односи, што е добро за економијата, за компаниите и за даночните приходи, посочува Брикер.

Германија губи 400.000 работници секоја година поради демографските промени. Според него, ако дополнително се намалат каналите кои добро функционираат, државата ќе има сериозен проблем.

За разлика од Брикер, политикологот  Холгер Колб, од Советодавниот совет за миграција и интеграција, го поддржува намалувањето на квотата за Западен Балкан. Тој смета дека не е битно од каде доаѓа работникот, туку во фокусот повеќе треба да биде неговата способност.