Американскиот претседател Џозеф Бајден денеска ќе го одржи својот последен говор во Генералното собрание на Обединетите нации (ОНГА) како претседател на САД.
Во обраќањето на Бајден пред Генералното собрание и на неговите средби со други светски лидери во Њујорк, главното прашање ќе биде конфликтот на Блискиот Исток и неговите потези во тој поглед, пренесува Гласот на Америка.
Бајден ќе им се обрати на стотици светски лидери кои секоја година се собираат на Генералното собрание на Обединетите нации, а говорот ќе го одржи во многу важен момент, изјави американската амбасадорка во ОН, Линда Томас Гринфилд.
– Го кажуваме секоја година, но оваа седница на Генералното собрание се одржува во клучен момент полн со предизвици. Списокот на кризи и конфликти кои бараат внимание и акција само продолжува и продолжува – изјави Томас Гринфилд.
На врвот на таа листа е кризната ситуација во Газа, а американската позиција за ова прашање не е во согласност со ставот на остатокот од Генералното собрание на ОН, кое минатата недела со големо мнозинство гласови усвои резолуција со која бара Израел ја прекина окупацијата на палестинската територија во следните 12 месеци, вели тој.
САД беа меѓу 14-те земји кои гласаа против, што според Томас Гринфилд е во согласност со противењето на Вашингтон на „едностраните мерки кои ги поткопуваат изгледите за решение со две држави“.
Аналитичарите очекуваат Бајден да зборува за поддршката за Израел и Украина во своето обраќање пред Генералното собрание на ОН и да посочи дека овие два конфликти се голем предизвик на крајот на неговиот претседателски мандат.
Генералната дебата во рамките на Генералното собрание на ОН започнува денеска, а завршува во понеделник на 30 септември.
