Поскапувањето на кафето не е само привремен шок – производителите пред големи проблеми

Светот се соочува со еден од најпредизвикувачките периоди кога станува збор за производството на кафе – пијалок кој е незаменлив дел од секојдневието на милиони луѓе ширум светот. Цената на кафето континуирано расте, а овие поскапувања не се само привремени шокови, туку долгорочна последица на глобалните економски, геополитички и климатски промени, кои се рефлектираат во крајната цена на производот.

На тоа влијаат неколку клучни фактори. Прво, климатските промени – традиционалните региони за одгледување кафе, како Бразил и Виетнам, се соочуваат со екстремни временски услови – суши, обилни врнежи и непредвидливи температури кои значително влијаат на квантитетот и квалитетот на бербата.

Логистичките предизвици исто така играат голема улога во цените. Прво погоден од пандемијата, веќе нарушениот синџир на снабдување беше дополнително комплициран со нападите на Хутите на товарни бродови во Црвеното Море. Ова го зголемува времето на транзит на бродовите од Азија до Европа од 30 на 90 дена бидејќи користат алтернативни рути. Во меѓувреме, предизвици се појавија и со транспортот на кафе од Бразил.

Зголемената побарувачка за кафе на глобално ниво дополнително ги зголемува цените. Азиските пазари бележат зголемување на потрошувачката на кафе поради промените во навиките на потрошувачите, што врши дополнителен притисок врз и онака ограничените залихи. Кафето стана толку драгоцено и скапо што неодамна имаше дури и случаи на кражба на зрна кафе од плантажи.