Покрената постапки од градежен инженер за три објекти во Битола

Утврдени неправилности за три објекти, а за четвртиот во тек е проверка на градежната документација и покренати постапки од градежен инспекторат за објекти во Битола. Ова се увиде при инспекциски надзор од страна на одделението за градежна инспекција при Општина Битола.

Како што информираат од локалната самоуправа, се работи за два објекта кои се наоѓаат на патот за Ниже поле, еден објект е кај населбата Довлеџик, а за последниот објект констатирано е дека се одобрила монтажа на настрешница без претходно да се обезбеди одобрување од Општина Битола.

– За еден од двата објекта кој се наоѓаат на патот кај Ниже поле констатирано е дека се гради објект од челични профили и покривка од панели, а на друг дел од парцелата се изведува конструкција од бетонски столбови, кровна конструкција од челични профили и покривка од панели, без претходно обезбедено одобрение за градење кое треба да биде издадено од градоначалникот на Општина Битола. Укажано е дека освен имотен лист, не се приложени никакви други документи за градбата – велат од општина Битола.

Кај другиот објект кој се наоѓа на излез од Битола констатирано е дека станува збор за објект кој е дивоградба и истиот бил изграден пред околу десет години како хала од челична конструкција покриен со панели и приклучен на електрична мрежа.

– Од страна на градежната инспекција, извршен е увид на уште еден објект во КО Дихово, и во тек е прибирањето на потребната документација за постапување – потенцираат од општина Битола.

Во последните три години од страна на општинскиот инспекторат се зголемени постапувањата на терен кој вклучуваат и постапувања при отстаранување на нелегално поставени објекти.

Имено во 2022 година, во Сектор општински инспекторат е постапувано по вкупно 1751 претставки, во одделението за домување, постапувано е по 1178 предмети, градежна инспекција, инспекција за патен сообраќај и патишта, постапувано е по 450 предмети, претставки дописи и слично, а во одделението за инспекција за приходи, туризам, угостителство, образование и спорт, постапувано е по 123 предмети.

Во 2023 година, постапено е по 1870 претставки, пријави и барања од кои: одделението за комунална инспекција и инспекција за животна средина имало 1285 предмети, градежна инспекција, инспекција за патен сообраќај и патишта 503, а инспекцијата за туризам, угостителство, образование и спорт, постапила по 82 предмети.

Во 2024 година, Секторот општински инспекторат постапил по вкупно 1559 претставки и барања, од кои: одделението за комунална инспекција и инспекција за животна средина постапило по 1038 предмети, градежна инспекција, инспекција за патен сообраќај и патишта по 347, а инспекцијата за приходи, туризам, угостителство, образование и спорт по 174 предмети.

– Зголемените контроли, продолжуваат и оваа година кој и понатаму ќе се одвиваат со зголемена транспарентност и информирање на граѓаните за случаите кои се од јавен интерес – велат од општината.

(С.Би.)