Поднесени 35 кривични пријави против 69 физички и 16 правни лица

За над четири пати е зголемен бројот на кривични пријави што ги поднела Царинската управа, преку Секторот за контрола и истраги, до Основното јавно обвинителство и до Јавното обвинителство за гонење организиран криминал и корупција. Од почетокот на годинава досега се поднесени вкупно 35 кривични пријави против 69 физички и 16 правни лица, додека лани во тој период биле поднесени осум кривични пријави.

– За неполни два месеци, има 74 случаи на заплени, при откриени прекршочни и кривични дела, раст од 64 проценти во однос на тој период минатата година. Во вторникот вечерта, на Богородица е спречен обид за шверц на поголема количина сребрен накит, близу 18 килограми – велат од Царинската управа.

Во последните десет дена, поднесени и осум кривични пријави против осум физички и две правни лица за сторено кривично дело фалсификување исправи по член 378 од Кривичниот законик. Се фалсификувале исправи со цел избегнување плаќање давачки во висина од 250 илјади денари, кои веќе се наплатени преку управна постапка. Поднесена е и кривична пријава за фалсификувана лиценца за вршење превоз на стока во меѓународниот патен сообраќај од надлежна институција. Ова е трета кривична пријава за вакво дело за период од неполни две недели – нагласуваат од Царинската управа.

Од Царината велат дека ќе има награди за оние цариници што спречиле обид за шверц на дрога, но и казни за оние што не постапуваат согласно со закон, треба да се казнат. Годинава се поведени 27 дисциплински постапки.