Вкупно 33 факултети во Србија се блокирани, јавија српските медиуми.
Според телевизија „Нова“, под студентска блокада се факултетите во Белград, Ниш, Нови Сад и во Крагуевац, а протестите секој ден се сè поголеми.
Студентите деноноќно протестираат барајќи одговорност за жртвите од трагедијата во Нови Сад и објавување на комплетната документација за реконструкција на железничката станица.
Први на протест излегоа студентите на Факултетот за драмски уметности, уште на 25 ноември, кога заедно со професорите и со поддршка на деканот блокираа булевар во текот на петнаесетминутниот молк за да им оддадат почит на жртвите во Нови Сад. Тогаш беа нападнати од непознати лица, а тој инцидент подоцна го поврзаа со владејачката партија – СНС, по што протестот се ограничи на блокада на зградата на ФДУ.
Во знак на солидарност, потоа им се придружија и студентите од другите 32 државни факултети, кои секој петок во 11:52 часот застануваат и молчат по 15 минути, во знак на почит кон жртвите од трагедијата во Нови Сад. Тие се единствени и во барањата да се гонат одговорните за падот на натстрешницата, како и напаѓачите на студентите, а приведените учесници на протестите да бидат ослободени.
