Почна новогодишното украсување на Делчево. Поставувањето на новогодишните реквизити, како што соопшти градоначалникот на Општината, Горан Трајковски, има цел да го облагороди градскиот парк и да го обликува во новогодишно руво.
– На тој начин, украсите што се поставуваат ја збогатуваат новогодишната атмосфера во Делчево, нудејќи содржина повеќе за убави фотографии, особено за најмладите – истакна Трајковски.
Тој апелираше да не се уништува урбаната опрема, како и новогодишните светилки и реквизити.
– Со нивно оштетување, се уништуваат јавните добра купени со буџетски средства на Општина Делчево и, покрај материјалната штета, лицата што ги уништуваат новогодишните светлечки украси, кои се под висок напон, ги изложуваат сопствените здравје и живот на ризик – потенцираше Трајковски, нагласувајќи дека треба сите заедно одговорно да придонесеме и да го зачуваме општото добро, со што ќе се овозможи децата да уживаат во новогодишната магија.
