Почина „човекот со златна рака“, кој со својата крв со ретко антитело спаси 2,4 милиони бебиња

Австралиецот Џејмс Харисон, познат како „човекот со златна рака“, почина во сон во домот за стари лица во Нов Јужен Велс, на 88-годишна возраст. Тој беше сосема обичен човек и јавноста не би чула за него ако немаше крв каква што ретко кој има, што ја даруваше во текот на речиси целиот свој живот и со тоа овозможи да дојдат на свет 2,4 милиони здрави-прави бебиња, кои биле во опасност во утробата на мајката.

Крвта на Харисон го содржеше реткото антитело анти-Д, кое се користи за производство на лек наменет за трудници, чија крв може да го нападне нивното неродено дете. Оваа состојба на бременост се јавува кога крвните зрнца на мајката се некомпатибилни со црвените крвни зрнца на бебето. Имунолошкиот систем на мајката ги гледа крвните клетки на бебето како закана и произведува антитела за да ги нападне. Ова може сериозно да му наштети на бебето, предизвикувајќи тешка анемија, срцева слабост, па дури и смрт. Пред да се развијат анти-Д интервенциите во средината на 1960-тите, едно од две бебиња со дијагноза на ХДФН умирало.

Харисон одлучил да стане крводарител откако примил трансфузија за време на голема операција на градниот кош на 14-годишна возраст. Тој почнал да донира крвна плазма на 18-годишна возраст и продолжил да го прави тоа на секои две недели до својата 81. година, вкупно 1.173 пати. Во 2005 година го собори светскиот рекорд по количеството на донирана крвна плазма, што го држеше до 2022 година, кога беше надминат од човек од САД.

Неговата ќерка Трејси Мелошип рече дека нејзиниот татко е исклучително горд што спасил толку многу животи, нагласувајќи дека секогаш велел дека донирањето не боли и дека животот што ќе го спасите можеби е ваш. Интересно е што Трејси, како и двајца од внуците на Харисон, добиле анти-Д имунизација, што дополнително го потврди значењето на неговите донации.

Посветеноста на Харисон на крводарителството и несебичната желба да им помогне на другите ќе остави трајно наследство во медицинската заедница и меѓу милионите семејства на кои благодарение на него им беше дадена можност за здрав живот на своите бебиња.