По трагедијата во Суми, Зеленски го повика Трамп да види што прави Русија, Трамп вели тоа било грешка, ЕУ гневна

По рускиот напад на Суми, во неделата, украинскиот претседател Володимир Зеленски побара од американскиот претседател Доналд Трамп да ја посети неговата земја и да биде сведок на трагедијата пред да се обврзе на каков било наводен мировен договор со Русија.

-Но ве молам, пред какви било одлуки, каков било облик на преговори, дојдете и видете ги луѓето, цивилите, борците, болниците, црквите, ранетите или мртвите деца, изјави Зеленски за американската телевизија Си-Би-Ес.

Во нападот со две балистички ракети на центарот на градот Суми во неделата загинаа најмалку 34 лица, меѓу кои две деца, а други 117, од кои 15 деца се ранети. Нападот се случил кога луѓето оделе во црква за празникот Цветници.

Рускиот ракетен напад врз Суми на Цветници беше грешка, изјави американскиот претседател Доналд Трамп.

-Ми кажаа дека направиле грешка. Но, мислам дека тоа е страшно. Мислам дека сите војни се ужасна работа, рече тој, додавајќи дека она што се случува во Украина е „војна на поранешниот американски претседател Џо Бајден“.

Зеленски ги повика САД, ЕУ и другите земји остро да реагираат за да се стави крај на војната. Нападот беше осуден од лидери на земјите на ЕУ. Францускиот претседател Емануел Макрон ја обвини Москва за „еклатантно непочитување на човечките животи, меѓународното право и дипломатските напори на претседателот Трамп“, а идниот германски канцелар Фридрих Мерц ја обвини Русија за „сериозни воени злосторства“ и „перфидност“, додека полскиот премиер Доналд Туск рече дека нападот претставува „руска верзија на прекин на огнот“.  Високиот дипломат на ЕУ Каја Калас рече дека тоа само служело како потсетник за важноста на поддршката на Украина „да се изврши максимален притисок врз Русија“, бидејќи Владимир Путин продолжува да ја одбива понудата за прекин на огнот.

Русија денеска соопшти дека мета била „воена цел“.

Портпаролот на Кремљ, Дмитриј Песков, изјави дека Русија „мети има само воени или воени цели“, одговарајќи на новинарско прашање за воздушниот напад врз североисточниот украински град што го шокираше регионот и меѓународната заедница.

Руското Министерство за одбрана објави дека во нападот биле употребени две балистички ракети Искандер и дека бил погоден „состанокот на украинските команданти“ во Суми. Истовремено, тие го обвинија Киев дека „ги користи цивилите како жив штит“.