Социјално ранливи семејства во текот на една година ќе добиваат по 1.000 денари месечна субвенција од државата за намалување на сметките за струја. Финансиската поддршка е насочена кон: домаќинства кои користат гарантирана минимална помош, семејства со деца со попреченост, како и згрижувачи на лица во социјален ризик. За оваа поддршка граѓаните ќе може да аплицираат со поднесување барање до Министерството за енергетика, рударство и минерални суровини кое на официјалната веб-страница www.energy.gov.mk, како и во два дневни весници наскоро ќе објави јавен оглас за пријавување.
Ова се предвидува со Програмата за заштита на ранливи потрошувачи на енергија за 2025 година со вкупен буџет од 60 милиони денари (еден милион евра) за нејзино спроведување.
Со оваа Програма се предвидува директна финансиска поддршка за ранливи потрошувачи на енергија, која ја спроведува Министерството за социјална политика.
– Околу 40.000 домаќинства ќе добиваат паричен додаток за покривање на дел од трошоците за енергенси во периодот од октомври до март. Дополнително, корисниците имаат право на забрана за исклучување од мрежата во месеците декември, јануари и февруари, право на одложување/реструктурирање на неплатени долгови. Приоритет при поправки на мрежата и ослободување од трошоци за повторно приклучување – информираат од МЕРМС.
Намалување на сметките за струја за 1.000 ден./месечно (12 месеци) им следува на домаќинства со деца со попреченост, ако вкупниот месечен нето-доход на домаќинството во 2024 година не надминува: 42.000 денари за домаќинство со два члена, 60.000 денари за домаќинство со три члена и 80.000 денари за домаќинство со четири или повеќе члена.
Згрижувачките семејства, пак, за нив, горната граница на месечен нето-доход е зголемена од 80.000 до 160.000 денари, во зависност од бројот на згрижените деца, при што посебниот додаток за згрижување не се пресметува во оваа сума.
Програмата предвидува и важни рокови и обврзувања, односно поддршката ќе престане доколку корисникот не плати две последователни сметки, сите корисници се должни да ги плаќаат преостанатите износи на сметките навреме.
Намалување на ДДВ за струја на 5% значи пониски сметките на граѓаните
СДСМ бара да се прифати нивниот предлог за намалување на ДДВ за електрична енергија од 18% на 5%. Со тоа, сметаат дека има значително намалување на сметките за струја на над 600.000 домаќинства.
– За сметка од 3.000 денари, заштедата за граѓаните ќе изнесува околу 400 денари месечно. Во услови кога животот станува сè поскап, сè повеќе семејства се соочуваат со финансиски тешкотии мерката на СДСМ за намалување на ДДВ за струја на 5% ќе донесе директно финансиско олеснување за граѓаните – велат од оваа опозициска партија.
Оттаму нагласуваат дека „Евростат“ измери дека граѓаните на Македонија плаќаат најскапа струја во регионот.
– Граѓаните се жалат дека јануарските сметки за струја им се зголемени од 20% до 30%, со што им е зададен уште еден сериозен удар врз нивните семејни буџети по серијата поскапувања на цените на производите, на храната, но и на парното – истакнуваат од СДСМ.
