Пензионерите може да отворат платежна сметка со основни функции кај банките. Таа нуди повеќе придобивки како што се ниски трошоци за одржување, со можност за користење релативно широк сет платежни услуги од банките, за надоместок што во моментов не може да надмине 38 денари, што е од големо значење за намалување на финансискиот товар на пензионерите.
Ова беше нагласено при средбата на претставниците на Народната банка, предводени од гувернерката Анита Ангеловска-Бежоска, со претседателката на Сојузот на здруженијата на пензионери на Македонија (СЗПМ), Станка Трајкова, и со другите претставници на Сојузот.
Гувернерката Ангеловска-Бежоска ја истакна важноста на поблиската соработка со здруженијата на пензионери заради заштита на нивните права како корисници на платежните услуги и нивно информирање за новините и погодностите што ги нуди новата законска рамка во оваа сфера.
Имајќи го предвид сетот платежни услуги што ги нуди и нискиот месечен надоместок, платежната сметка со основни функции е особено погодна за пензионерите и за учениците и студентите што користат државна стипендија. За потрошувачите што ѝ припаѓаат на групата корисници на законски права, платежната сметка со основни функции е бесплатна.
За отворање платежна сметка со основни функции кај банките, се поднесува барање за отворање ваква сметка или за трансформирање на постојната.
Заменик-директорката на Дирекцијата за платни системи, Биљана Доновска-Гечева, одржа презентација пред претставниците на Сојузот, се осврна на карактеристиките на платежната сметка со основни функции.
Таа нагласи дека со новиот Закон за платежни услуги и платни системи, за првпат во нашата земја се вовела платежна сметка за која законски е ограничена висината на надоместокот.
– За услугите опфатени со платежната сметка со основни функции, банката може да пресмета и да наплати вкупен месечен надоместок до одредена разумна висина, која не смее да биде повисока од 0,1 % од просекот на последните 12 месечни просечни исплатени нето-плати во земјата, според Државниот завод за статистика (или во моментов 38 денари). Овој надоместок вклучува одржување на платежната сметка и на дебитната картичка, онлајн користење Интернет и мобилна апликација, неограничен број платежни трансакции за уплата или повлекување готовина непосредно на шалтерите во работните простории на банката или преку нејзината мрежа на банкомати, неограничен број платежни трансакции со дебитните картички и извршување минимум пет платежни трансакции во рамките на истата банка – посочи Доновска-Гечева.
